Xizmên girtiyan ji ber girtîgehê bang kirin: Dibe ku sibe dereng be 2022-10-04 13:04:00       AMED - Xizmên girtiyan ên ku di çarçoveya Nobeda Edaletê de daxuyanî dan gotin, "Bila her kes berpirsiyariya xwe zanibe û dibe ku sibe dereng be."   Çalakiya Nobeda Edaletê ya xizmên girtiyan a ku ji bo girtiyên nexweş û ên ku înfaza wan hatiye şewitandin bên berdan hat destpêkirin li ber Girtîgeha Tîpa D a Amedê berdewam kir. Malbatan di çarçoveya çalakiya xwe de daxuyanî dan.    Federasyona Piştevaniya Hiqûqê ya ji bo Malbatên Girtî û Hikumxaran a Medê (MED TUHAT FED), Komeleya Piştevaniya bi Malbatên Girtî û Hukumxaran re (TUAY -DER)  Komeleya Yekitî Çand û Piştevaniya bi Malbatên Xizmên xwe li Dergûşa Şaristaniyê ya Mezopotamyayê Winda Kirine (MEBYA - DER), Hewldana 78'an a Amedê û Komeleya Ziman û Çasndê ya Mezopotamyayê (MED -DER) piştgirî dan malbatan.   'Bila bersivê bidin daxwazên me'   Ji xizsma girtiyan Herdem Mervanî diyar kir ku ew 11 meh in di çalakiyê de ne, ji daxwazên wan re tu agahî nehatiye dayîn û wiha berdewam kir, "Em dîsa bi heman daxwazan li ser piyan e.  Em daxwazên xwe nû dikin. Ev hefte ji bo me girîng e. Kî  çi dike bila bike. Bi taybetî jî partiyên siyasî bila bersiveke şênber bidin me. Ji ber ku rewşa girtiyên nexweş her diçe xira dibe. Êdî em bi axaftinê rewşa wan nikarin vebêjin.  Berpirsiyariya herî mezin li ser pişta partiyên siyasî ye.  Çi dikin bila niha bikin. Em îro wekî xizmên girtiyan me xwe kir du beşan beşek li vir û yek jî li Enqereyê ye.    'Bila girtiyên nexweş serbest bên berdan'   Herdemê anî ziman ku girtiyên li ber mirinê ne serbest berdidin û ev tişt got, "Piştî ku girtî nema dikarin dermankirinê qebûl bikin û li ber mirinê ne serbest berdidin.  Em careke din dibêjin berpirsiyarî ya partiyên siyasî ye û ev hefteyeke krîtîk e li gorî wê bila herkes bi berpirsiyariya xwe rabe û dibe ku sibe dereng be. Em spasiya her kesên ku heta niha piştgirî dane me dikin."    Daxuyanî bi dirûşma, "Bijî berxwedana zindanan", "Heq hiqûq edalet" bi dawî bû.