
MKGP: Hedefgirtina Nagîhan Akarsel hedefgirtina îradeya jinên kurd e 

2022-10-04 13:57:29


	&nbsp;

	AMED - MKGP'ê derbarê qetilkirina Endama Navenda Lêkolînên Jineolojiyê û edîtora Kovara Jineolojiyê Nagîhan Akarsel de diyar kir ku li çar aliyên Kurdistanê jinên kurd hedef tên girtin û got:"Em wekî MKGP'ê diyar dikin ku hedefgirtina Nagîhan Akarsel hedefgirtina îradeya jinên kurd û Gelê Kurd e. Em hedefgirtina jinên kurd bi zimanekî tund şermezar dikin û dibêjin ku wê tu êriş, gef, tundî, îşkence, binçavkirin, zext û zordestî pêşiyê li têkoşîna jinên kurd a bi salan nikaribe bigire. "

	&nbsp;

	Platforma Rojnamegerên Jin a Mezopotamyayê (MKGP) derbarê qetilkirina Endama Navenda Lêkolînên Jineolojiyê û edîtora Kovara Jineolojiyê Nagîhan Akarsel a li Bajarê Silêmaniyê ya Başûrê Kurdistanê daxuyaniya nivîskî da. MKGP'ê di daxuyaniyê de ragihand ku Zihniyeta ku li Başûrê Kurdistanê endama Navenda Lêkolînên Jineolojiyê Nagîhan Akarsel qetil kir û zihniyeta ku li Îranê dîsa jina Kurd Jîna Mahsa Amînî qetil kir heman zihniyet e. Ev zihniyet kîn û hêrsa dilê xwe ya mezin li dijî jinên kurd her roj bi awayekî din derdixe holê.

	&nbsp;

	Di berdewamiya daxuyaniyê de wiha hat gotin:

	&nbsp;

	"Îro Endama Navenda Lêkolînên Jineolojiyê û edîtora Kovara Jineolojiyê Nagîhan Akarsel a ku di heman demê de bi salan rojnamegerî jî kiribû di encama êrîşa çekdarî de li bajarê Suleymaniyeyê yê Başûrê Kurdistanê hat qetilkirin. Nagîhan a ji bajarê Konyayê bû karê rojnamevaniyê, nivîskariya rojname û kovarên jinan kiribû. Heta niha mohra xwe li binê gelek karên lêkolînê yên derbarê jinan li Kurdistanê û derveyî welat, xistibû. Çend sal bû li Silêmaniyeyê ji bo bingeha akademiya Jineolojiyê li Başûrê Kurdistanê dixebitî.&nbsp;

	&nbsp;

	Wê tu êriş û gef pêşiyê li têkoşîna jinên kurd a bi salan nikaribe bigire

	&nbsp;

	Êriş, tundî, binçavkirin, girtin, îşkenceya li dijî jinên kurd ên çalakger, rojnameger, siyasetmedar, parêzvanên mafên mirovan didomin. Bi êrişa li ser Nagîhanê em careke din bû şahid ku ev sîstema li dijî jinên kurd, xwediyê bêtehemuliyeke bi çi rengî ye. Zihniyeta ku li Başûrê Kurdistanê endama Navenda Lêkolînên Jineolojiyê Nagîhan Akarsel qetil kir û zihniyeta ku li Îranê dîsa jina Kurd Jîna Mahsa Amînî qetil kir heman zihniyet e. Ev zihniyet kîn û hêrsa dilê xwe ya mezin li dijî jinên kurd her roj bi awayekî din derdixe holê. Li her çar aliyên Kurdistanê jinên kurd dike hedef. Herî dawî li rojnamegerên jinên kurd Hatice Şahîn, Sadiye Eser û Nûrcan Yalçin jî ceza hatibûn birîn û bi vê rêyê hat xwestin ku rê li ber xebat û têkoşîna jinan bê girtin. Lê belê li dijî êrişan têkoşîn, serhildan, bertek û xwedîderktina nasnameya jinên kurd jî didome. Em wekî Platforma Rojnamegerên Jin a Mezopotamyayê (MKGP) diyar dikin ku hedefgirtina Nagîhan Akarsel hedefgirtina îradeya jinên kurd û Gelê Kurd e. Em hedefgirtina jinên kurd bi zimanekî tund şermezar dikin û dibêjin ku wê tu êriş, gef, tundî, îşkence, binçavkirin, zext û zordestî pêşiyê li têkoşîna jinên kurd a bi salan nikaribe bigire."&nbsp;

	&nbsp;