Komkujiya Helebê ket rojeva parlamentoya Swêdê 

2026-01-14 13:04:24


	 

	NAVENDA NÛÇEYAN - Ji bo bersivdayînê der barê komkujiya li Helebê de pêşniyazpirsek berpêşî Wezîra Derve ya Swêdê Maria Malmer Stenergar hat kirin. 

	 

	Êrîş û komkujiyên li dijî Kurdan li taxên Şêxmeqsûd û Eşrefiye yên Helebê ji aliyê Kurdên li Skandînavyayê û her wiha li gelek welatên din ên Ewropayê ve hatin protestokirin.

	 

	Êriş û komkujiyên li hemberî Kurdên li taxên Şêxmeqsûd û Eşrefiyê yên Helebê ketin rojeva Parlamentoya Swêdê. Parlamenterê Sosyal Demokrat Kadîr Kasirga pêşniyazpirsek pêşkêşî Wezîra Karên Derve Maria Malmer Stenergar kir. Kadîr Kasirga bi bîr xist ku li gel malbatên Kurd, her wiha malbatên ji pêkhateyên olî yên cuda ji Xiristiyan û Êzdiyan jî neçar man malên xwe biterikînin û ragihand ku ev rewş modeleke zilmê û tundiya bi rêk û pêk a li ser Kurdan, Xiristiyan, Elewî û Durziyan e.

	 

	Beşek ji pêşniyazpirsa parlamenter Kasirga bi vî rengî ye:

	 

	"Swêd ji aliyê parastina mafên mirovan, mafên hindikahiyan û hiqûqa mirovî ya navneteweyî ve demeke dirêj e xwedî xeteke zelal e. Swêd her wiha parçeyek ji koalîsyona navneteweyî ya li dijî DAÎŞ'ê ye ku Hêzên Sûriyeya Demokratîk jî di nav de ye. Ev yek jî berpirsyariya Swêdê ya ji bo aramiya li Sûriyeyê, parastina sivîlan û hurmeta li mafên mirovan hîn bêhtir destnîşan dike ku divê bikeve nava liv û tevgerê.

	 

	Di vê çarçoveyê de dixwazim vê pirsê li Wezîra Karên Derve Maria Malmer Stenergard bikim:

	 

	Ji bo danûstandinên Swêdê yên bi aktorên li Sûriyeyê re di çarçoveya hurmeta li mafên hindikahiyên etnîkî û olî de be û tundiya li sivîlên li Helebê û herêmên din ên welêt bê rawestandin, plan dike ku kîjan tedbîran werbigirin?"

	 

	Gelek parlamenterên Sosyal Demokrat û Partiya Çep ên li Parlamenta Swêdê jî bi daxuyaniyan HTŞ ji ber komkujiya li Helebê şermezar kirin.