Ji bo kesên ji ber şer koçber bûn piştevanî 

2024-12-14 14:44:13


	 

	 

	Mîdye Miqted

	 

	HELEB - Li taxên Şêxmeqsûd û Eşrefiyê ya bajarê Helebê bi pêşengtiya Weqfa jinên azad a Sûriya alîkarî hat belavkirin.

	 

	Weqfa Jinên azad a Sûriya bi pêşengiya Kongra Star, Rêxistina Sara, Rêxistina Nûdem a Astengan her wiha Rêxistina Stêrk a Zarokan alîkarî li welatiyên ku ji kantona Şehba derbasî taxên Şêxmeqsûd û Eşrefiyê yên Helebê bûne belav kirin. Alîkariya ku bi taybetî ji bo pêdivyên zarokan hat belavkirin ji şîr û cilan pêk tê.

	 

	Ji neçarî derbas taxê bûne

	 

	Endama Rêxistina Nûdem a astengdaran Meryem Şêx qember têkildarî vê insiyutifê ji ajansa me re axivî û wiha got:"Piştî ku êrîş bi ser koçberên Efrînê yên ku li Şehbayê hatibûn bicihkirin pêk hat ,welatî ji bo xwe parastina ji şer neçar man derbasî taxên Şêxmeqsûd û Eşrefiyê bibin.  Ligel ku gelek ji van niştecihan  berê xwe dan Rojhilatê Firatê, hin malbet jî derbasî taxên Şêxmeqsûd û Eşrefiyê bûn."

	 

	Ji bo zarokan alîkarî

	 

	Di dewama axaftina xwe de Meryem wiha got:"Em weke tevger û rêxistinên jin ji bo ku em bi gelên xwe yên derbasî taxên Şêxmeqsûd û Eşrefiyê bûne re bibin alîkar, me dest bi belavkirina alîkariyê ji bo zarokan kir. Alîkarî ji cil û berg û Şîrê zarokan pêk tê."

	 

	'Em bi hev re dibin alîkar'

	 

	Meryemê wiha gotina xwe bidawî kir:"Ev gava me ya destpêkê ye û wê her alîkariya me ji wan re berdewam bike. Çi ji destê me were em ê ji bo van mexdûran bikin. Ji xwe Meclisa Giştî ya her du taxên Şêxmeqsûd û Eşrefiyê ji wan re xanî peyda kirin û qomîteya tendirustiyê ya Kongra Star jî çi ji wan tê xwestin dibin alîkar."