Bajarê Leyla Guvene Cîhanbeylî de vayê HDPyî  

2019-03-19 14:46:47


	 

	Dîlan Babat

	 

	KONYA - Bajarê Leyla Guvene, Cîhanbeylî de HDP xebatê weçînayîşî bêmabên meşneno û bi taybet zî cinî eleqeyêke pîl ramojnenê. Hemsereka HDPyî qeza Eylul Yaylaciye da zanayîş ke şar bi serran o seba nêzdîbîyayîşê şaredarîya rantwer acis bîyê û va: "Cîhanbeylî êdî wazeno rengê cinîyan bivîno. cinî bi hêzê ke Leyla Guvene ra gênê, çi destê înan ra yeno kenê."

	 

	Cîhanbeylî yê Konyayî de xebatê weçînayîşî bêmabên dewam kenê. Cîhanbeylî eynî wextî de bajarê Hemsereka KCDyî û Parlamentera HDPyî ya Colemêrgî Leyla Guvena ke vera tecrîdî bi 132 rojî yo grev de ya yo.

	 

	Hemsereka HDPyî Cîhanbeylî Eylul Yaylaciye arde ziwan ke ê bi rayberîya cinîyan xebatê weçînayîşî danê meşnayîş.

	 

	'Ma zaf girîngî da ke cinî ci de bibê'

	 

	Eylule da zanayîş ke HDPyî yewin rey Cîhanbeylî de weçînayîşê mintiqa de namzed vetê û wina va: "Weçînayîşê mintiqa yê verê de dayeyê rayan qîmê girewtişê şaredarî nêkerdêne. Ma do emsar reya diyîn bikoyê weçînayîşan. Emsar vayê weçînayîşî hetê ma de yo. Ma bi xebat û şarê xo dir nê vînenê. Ma xo zaf bi şans vînenê. Bi serran o Cîhanbeylî ferasetê şaredarîyêke cinî ci de çin ê esto. Şarê Cîhanbeylî êdî nê çîyan vîneno. Zanê ke şaredarê xizmetê awe û rayîr tena nîya. Şarê Cîhanbeylî û cinîyê ci HDPyî vejenê vernî. Nê prosesê weçînayîşî de ma lîsteyê endamê meclîsê şaredarî awan kerd. Ma zaf girîngî da ke cinî ci de bibê."

	 

	'Ma wazenê rengê cinîyan bivînê'

	 

	Eylule da zanayîş ke dewan de zî xebatan meşnenê û hetê şarî ra rastê eleqeyêke pîl yenê û va: "Cinî dîyar kenê ke ê qeza de wazenê rengê cinîyan bivînê. Eke HDP şaredarî bigîro do yewin rey masayê cinîyan bêrê awankerdene. Her dewe de komîsyonê ma estê û nîmeyê înan komîsyonan zî cinîyan ra yenê meydan. Şar lazimîyê bi vengêke cîya vîneno."

	 

	Eylule bale ante ser grevê vêşanîye ya Leyla Guvene ke 132 roj pey xo de verda û arde ziwan ke cinîyê Cîhanbeylî xoverdayîşê Leylaye ra hêz gênê û bi nê hêzî çi destê înan ra yeno kenê.