Ciwananê Kobanêyijan rayşîyayîşêko bi meşaleyan 15 Sibate şermezar kerdî 

2020-02-10 14:54:49


	 

	KOBANÊ - Çarçeweya rêzeçalakîyanê hemleyê Kongreya Starî yê derheqê komploya mîyanneteweyî de ciwananê PYDyî rayşîyayîşêko bi meşale organîze kerdî.

	 

	Rêzeçalakîyanê Kongreya Starî de Ciwananê Partîya Yewîya Demokratîke (PYD) ya Kantonê Kobanê bi sloganê, "Bi ciwanîya şorişî, ma do faşîzmî bişkînê û Rayberî azad bikerê" rayşîyayîşêko meşaleyî organîze kerdî. Rayşîyayîş de fotografê Rayberê PKKyî Abdullah Ocalan û beyraqê PYDyî ameybî wedaritene. Rayşîyayîş wareyê cinîya azad de dest pêkerd, heta wareyê aştîye dewam kerd.

	 

	Dimayê rayşîyayîşî bi deqeyêko rêzgirewtene ra, Hemsereka Meclîsê Ciwananê PYDyî ya mintiqaya Firatî Xunav Xelîle qisey kerde û bale ante serê komploya mîyanneteweyî û wina vat: "Amancê rayşîyayîşê mi, şermezarkerdene komploya mîyanneteweyî ya şexsê Rayber Apo de serê şarê kurdî de yeno meşnayene yo. Komploya mîyanneteweyî 21 serrî pey xo de verda. Nê dewletê ke nika şerê xo serê mintiqayanê ma de dewam kenê, destê înan mîyanê komployî de esto. Amancê dewletan oyo ke projeyê netewa demokratîke veng vejê. Ewro zî wazenê, yewîya şarê mintiqa yewbînan ra cîya bikerê. Ma soz danê Rayber Apo ke ma do serê fikr û felsefeyê ey de bê û îşxalkerdene rê bidê vindîkerdene."

	 

	Rayşîyayîş bi sloganê, "Bê Serek ciwîyayîş nêbeno" peynî bi.