'Tecrîd dewamê komployê 15 Sibate yo'

2020-02-11 14:20:53


	 

	MÊRDÎN - Parlamentera HDPyî ya Ebru Gunaye dîyar kerde ke tecrîdo giran ke serê Rayberê PKKyî Abdullah Ocalanî de dewamê komployî yo û vat, sebebê merdişan zî tecrîd o.

	 

	Parlamentera Partîya Demokratîke ya Şaran (HDP) ya Mêrdînî Ebru Gunaye da zanayene ke 15ê Sibate ke tarîxo ke Abdullah Ocalanî bi komployê mîyanneteweyî ardî Tirkîya û vat, tecrîd bi komployî dir roje bi roje kûr beno.

	 

	Ebruye da zanayene ke gama ke rewşa sîyasî ya bîyaye bêra ercnayene, ganî sîstemê Îmralî yê 21 serran bêro ewnîyayene û bi 15ê Sibate dir tecrîd ameyo destpêkerdene û roje bi roje tewr giran bîyo. Ebruye nê çî vatî: "Amancê vetişê Birêz Ocalanî yê Rojhelato Mîyanên estbi. Amanc o bi ke problemê Kurdan bêçare verdê, Abdullah Ocalanî Rojhelato Mîyanên ra vejê û şarî, bi şîroveyanê ey ra bêpar verdê.  Tecrîd hema zî nê esasan ser o dewam keno."

	 

	'Tecrîd serê pêro komelî de dewam keno'

	 

	Ebruye dewamê qiseykerdişê xo de arde ziwan ke semedê polîtîkayê bêçareserî de israr kenê, tecrîd dewam keno û AKP bi tecrîdî dir şer awan keno û Ebruye wina dewam kerd: "AKP semedê beka xo polîtîkayê şerî de israr keno. Coka bi şer wey beno û coka polîtîkayê tecrîdî bi ca ano. Sîstemêko tecrîdî yê roj bi roje zêde beno esto. No tesîr serê pêro cuya ma de keno. Tecrîd pêro komelî rê yeno kerdene.

	 

	'Wazenê vernîya aştîye bigîrê' 

	 

	Ebruye da zanayene ke bi tecrîdî wazenê vernî bigîrê ke felsefeyê Ocalanî nêreso şarî û wina vat: "Ma bi taybet dimay serra 2015ine nê çî kûr de hîs kerd. Qedexeyê tebervejîyayîşê kuçeyan, pêrodayîşê ke ameyî ciwîyayene û merdişê ke zêde bî, ramojna ke tecrîd girawe ra vejîyayo û şaristanan de vila bîyo. Vera nê de polîtîkayê şerî dewam kerdî. Hewl dayî ke vernîya aştîye bigîrê. Sîyasetê zere û teberê welatî, hetê şer de aver şi. AKP bi serran o xêrcê şerî tu çî şarî ra qalî nêkerd."