Êzidîyê ke Mîdyat de yê mengêka ya nêweşxaneyê dewlete de nînê dermankerdene 

2020-02-17 13:37:31


	 

	MÊRDÎN - Êzidîyê ke netîceyê hêrişê DAIŞî de mecbur mendîbî koçê herême bikerê, pêwa nasnameyê înan yê pawitişê qeydkerdene estê zî na mengêke ya nêweşxaneyê dewlete de nînê dermankerdene.

	 

	2014 de DAIŞî hêrişê Şengalî kerd û netîceyê hêrişî de bi hezaran ameyê Tirkîyaye û 4 hezar kesî Kampa Fîdanî ya Şaredarîya Şaristanê Girdî ya Amedî de ameyî bicakerdene. 2016 de dimayê ke qayûm tayînê şaredarî bi, kampe ameye vengkerdene û keyeyî kampa AFADî ya Mîdyatê Mêrdînî de bi ca bî. Tebaxa 2018 de Mudûrîyê Pêroyî yê Îdareyê Koçberî yê girêdayê Wezaretê Karê Zerî, kampe padayî û keyeyî uca ra vejîyayî. 

	 

	Dimayê ke kampe ameye padayene, vera ke keyeyî kampê herême de bêrê bicakerdene, qeza de keyeyî kîra kerdî û cuya xo wina dewam kenê. Welatîyê Êzidî dîyar kerdî ke na mengêke ya pêwa nasnameyê înan ê pawitişê qeydkerdene esto zî nêweşxaneyê dewlete de nînê dermankerdene.

	 

	'Ma hîrê rey cayê xo ra ameyî kerdene'

	 

	Horî Alî Jafrî ya ke 2014 de herêma Xanesorê ê Şengalî de seba şerî koçê Tirkîya kerde, dîyar kerde ke dimayê şer zî zor û zehmetî cuya înan peynî nêbîya û vat: "Ma 2014 de seba fermanî ameyî tîya. Hewteyêko ma rayîr de perîşan bî. Ma vêşan û têşan mendî. German ra ma mergî dir ameyî rî bi rî. Dimayê ke ma ameyî tîya, ma eşrawitî kampa Amedî. Uca de rewşa ma baş bî. Ma ra hez kerdêne. Ma tay bo zî şer xo vîr ra kerdêne. Ma 2017 de eşrawitî Mîdyat. Ma nika kampa Mîdyatî de zî bimendêne rewşa ma tewr baş bîne."

	 

	Horîye dewam de nê çî vat: "Ma demêko kampe de mendî û ma vetî. Ma bi Erebê Sûrîye dir ardibî û înan dir ma mendêne. Pêro ney, la tay kesan seba bawerîya ma, ma rê heqaret kerdêne. Dima ra kampe amî vengkerdene. Ma zî qeza de keye girewt. Ma tîya zî xeylêk probleman ciwîyenê. Dima ra ma hewl da şêrê Ewropa. Tay kesî qeza de mendî. Verê ma bi qertê pawitene ameyne dermankerdene.  Verê ma pêro têhet bî. Ma çadiran de mendêne. La nika ma pêro vila bî. Nika nîmeyê ma şî Ewropa. Ma zî tîya mendî. Verê ma bi nasnameyê xo şîne nêweşxane. Nika mengêke yo ma derman nêkenê. Gerek ma şêrê Mêrdîn. Qeza de vanê, ‘qeydê şima çin o û derman nêkenê'."