Semîr Ebid Elah: Xopawitiş hezar dermanan baştir o 

2020-03-19 14:16:47


	 

	Ronîda Hacî

	 

	HESEKE - Hemsereka Kantonê Hesekî Semer Ebid Elahe da zanayene ke semedê pawitişê şarî yê Vîrusê Korona ra înan dest bi hemleyêko kerdo û wina vat: "Xopawitiş hezar dermanan baştir o."

	 

	No wextêko Vîrusê Korona dinya vila bîyo û xeylêk kesan zî cuya xo vindî kerd û goreyê doktoran heta nika tu derman ci rê nêameyo peydakerdene. Îdarekarê Xoser yê Vakur û Rojhelatê Sûrîye şîyîş û ameyîşê welatîyan qedexe kerd. Derheqê nê babete de Hemsereka Kantonê Hesekî Semir Ebid Elahe ajansê ma rê şîrove kerd.

	 

	'Semedê pawitişê sivîlan ma do mîyanê tevgerî de bê'

	 

	Semere dîyar kerde ke semedê tedbîran hemleyêko kerdê û wina vat: "Ma sey Kantonê Hesekî tedbîrê xo gênê ke vernîya Vîrusê Korona bêro girewtene. Semedê  girewtişê tedbîrê ma dest bi hemleyê pakkerdiş û dezenfekteyî kerd."

	 

	'Ma sazgehan derman kenê'

	 

	Semere dewam de wina vat: "Vizêr ra ma mîyanê tevgerî de yê, temamê sazgehê Îdarekarê Xoser ma derman vila kerd. Eynî wextî de cayê pêroyî sey xerac zî ma derman vila ked. Dima ra pêro wendegehan de bêro vilakerdene. Qonaxê diyîn de ma do kuçeyan de vila bikerê."

	 

	'Xopawitiş hezar dermanan baştir o' 

	 

	Semere vat, xopawitiş hezar dermanan ra başîr o û wina vat: "Vatişê verênan de ameyo vatene ke xopawitiş hezar dermanî baştir o, semedê nê zî ewro ma pawitişê xo kenê ke ma bieşkê ke ma vernîya vîrusî bigîrê. Xêrcê nê nêweşxane û merkezê ke tena girêdayê Vîrusê Korona amade kerd."

	 

	'Şarê ma wa pawitişê xo bikerê'

	 

	Semere tewr peyîn wina vat: "Ma wazenê şarê ma ma dir bibo hetkar û pawitişê xo bikerê. Semedo ke  rewşe cidî ya û nêzdîyê ma bena. Ma bi omidê ke qerarê ke Îdarekarê Xoser semedê pawitişê şarî vejeno şar verê çiman ra derbaz bikero û ma pîya vernîya Vîrusê Korona bigîrê."