‘Ganî şarê ma her ca de adirê Newroze we bikero’ 

2020-03-20 14:18:17


	 

	Berîtan Canozer

	 

	AMED - Hemsereka HDPyî Amedî Hulya Alokmene, da zanayane kampanya ke HDPyî serê çapemenîya komelî de dayê destpêkerdene, ‘Her ca Newroze ya’ ganî wayîr ci rê bêro vejîyene û vat: “Adiro ke Kawa fîna ta, tarîx de qet nêtefîya. Verpayê ci gûr bi. Gerek ma cayê ke tedeyê açernê wareyê Newroze.”

	 

	Vîrusê Korona (Cov3id-19) pêro dinya de vila bi û Tirkîya de zî ame tespîtkerdene. Dimayê nê Tirkîya de mîtîng, bernameyê girseyî ameyî betalkerdene. Yew bernameyê ke ame betalkerdene zî roşanê Newroze bi. Serê nê de HDPyî çapemenîya komelî de kampanyaya ‘Newroze her ca de ya’ da destpêkerdene. Veng ame dayene ke emşo saete 20.20 de şar her ca de balkonan û pacayanê xo de Newroze firaz bikerê.

	 

	‘Omid û bawerîyê şaran o’

	 

	Hevseroka HDPyî ya Amedî Hulya Alokmene, da zanayene ke Newroze semedê şarê Kurd xeylêk girîng a û vat: “Sey şima zanê Newroze bi serran a bi beşdarbîyayîşê deshezaran kesî ra yena firazkerdene. La emsar semedê vîrusê korona ameye betalkerdene. Newroze semedê şarê Kurd û Rojhelatê Mîyanên xeylêk girîng a. Newroze semedê şarê Kurd xoverdayîş û mijdanîyê wisarî ya. Tarîx de yewin rey Newroze ameye betalkerdene. Wexto ke Newroze hetê hukmat ra ameyne qedexekerdene de zî şarê Kurd ware pirr kerdêne. La nika ma  bi rewşêka cîya dir rî bi rî yê.”

	 

	‘Ganî her kes keye de vengê xo vejê’

	 

	Hulyaye da zanayene ke semedê rîskê vîrusî û vernîya vîrusî bêro girewtene û vat: “Ma xebatê partîye de zî sînor kerd. La ma veng da heme kesan ke cayê ke manenê veng vejê û keyeyê xo de lambeyan akerê û bitefnê û feneran abikerê. Emşo her kes keyeyê xo de vajo, ‘Newroze her ca de ya.’ Ez Newroza heme şarê ma pîroz kena.”