Merdimê hepsîyan: Hepsîyê sîyasî ganî cîya nêrê destgirewtene 

2020-04-05 14:38:42


	 

	Medya Uren-Rengîn Azîzoglu

	 

	AMED - Paketa hukmî ke semedê hepsîyan ameye amadekerdene de hepsîyê sîyasîyan rê ca nêame dayene. Merdimê hepsîyan reaksîyon vera nê dayî û vatî ke ê têduştî wazenê. Keyayan dîyar kerdî ke çîyêk winasî nîno qebulkerdene û bi hezaran hepsîyê sîyasî yê nêweşî nê dir rî bi rî yê.

	 

	Nêweşîya Korono (COVÎD-19) a ke bi lez her cayê Tirkîya vila bîya û bî sebebê mergî. Pisporî seba astengkerdişê nêweşîye her roje seba pakitî, îzalasyon û weşîye ser o îqaz kerd. Nê cayê ke tehluke awan kenê zî zîndanê. Tirkîya de 300 hezar kesî zîndanan de manenê û her roje derheqê nêpawitişî û pakitî de hepsî bi rayîrê telefonan gerre kenê. Nê prosesî de hetê îqtîdarî ra paketa hukmî ê 3ine ameya amadekerdene zî kewte rojeve. La ame vatene ke hepsîyê sîyasî pakete ra feyde nêgîrê. Merdimê hepsîyan reaksîyon vera qerarî dayî û problemê ke zîndanan de yenê ciwîyene bi ajansê ma dir pare kerdî.

	 

	'Kantînê zîndanan heme hacetê xeylêk vay danê'

	 

	Waya hepsîyo bi nameyê Omer Ezerî, Fatma Ezere ke reaksîyon ramojna û qalê hepsîyan kerde û vat: "Yeno zanayene ke pêvînayîşê bi hepsîyan dir ameyo qedexekerdene. Ma bi rayîrê telefonî, bi merdimê xo yê hepsîyan dir qisey kenê û no zî bi deqeyan sînorkerde yo. Pêvînayîş de Omerî qalê asayîş û tedbîrê zîndanan de yenê girewtene kerd û da zanayene ke ê heqê xo yê derûdorî, bi embazanê xo dir roniştişî, yan zî pîya bi werdişî dir mehrum manenê. Belkî nê şima rê kerdişê asan bêrê la tena warryê ma yê komelî no yo. Mîyanê çar dêsan de çîyêko boya ma keno hîra no yo. Labelê nika nêeşkenê nê çîyan bikerê. Coka Omerî vat xêrcê înan tu tedbîr nînê girewtene. Malzeme û lazimîyê semedê pawitişî nînê dayene. Dezefenktan, kolanya, maske û lepik înan rê nînê dyene. Nê ra lîmone ameye vîrê mi, mi vat, tay bo zî do vera dezefenktanan bigîrê. La kantîn de ê zî vay yenê rotene. Çîyê ke teber ra yenê zaf vay yenê rotiş û nê zî tena malzemeyê pawitişî yê."

	 

	'Pereyo ke ma eşrawito nêresayo destê înan'

	 

	Cinîya hepsîyê sîyasî ê bi nameyê Cengîz Kazici, Zeynep Kaziciye zî û va ke yê ke zîndan de hîna tehluke de yê û vat: "Hepsî her tewir, probleman ciwîyenê. Seba asayîşî tu malzeme înan rê nîno dayene. Hepsî hetê werd û şimitişî de zî probleman ciwîyenê. Semedo ke nêeşkenê tedbîrê baş bigîrê, vilabîyayîşê vîrusî dir do problemê cidî vejîyê. Ma 2 rey bi rayîrê PTTî pere înan rê eşrawit, la hema nêresayo destê înan û malzeme bêpere nêdanê înan. Mêrdeyê mi mîyan de bi hezaran hepsî kewtî grevê vêşanîye. Dimayê ke grev qedîya  zî tedawîyêka baş nêameye kerdene. Mêrdeyê mi dir fitiq esto, lazimo ke tedawî bibo la tedawîya ci nêkenê. Hukmat bi paketa hukmî, bi hezaran hepsîyê edlî do serbest vera bido. Eke qanunêko vetê, ganî her kes têduşt ci ra feyde bigîro. Madem şima veng danê û vanê, her kes wa keyeyê xo de bimano, gerek hepsî zî bêrê keyeyê xo. Zerrîya ma rehet nîya. Têduştî heqê heme kesî ya."

	 

	'Hukmat wazeno zîndanan bikero goristan'

	 

	Hatun Yildiza ke dayîka bi nameyê Ferhat Yildizî ya, vat ke lajê ci 6 serrî yo zîndan de yo û wina qalî kerde: "Ez her roje bi ters çimanê xo roja newe rê akena. Ma prosesê girîng derbaz kerdî û ewro zî vera vîrusî têkoşîn kenê. Pawitişê hepsîyan, wezîfeyê hukmatî yo. Labelê xêrcê qedexekerdişê pêvînayîşî, hukmat tu tedbîran nêgîno ke hepsî nêeşkenê bi îmkananê xo nê tedbîran bigîrê. Semedo ke hacetê pawitişî nêdanê û bi taybet zî malzemeyê pakitî bi vayîyêko giran kantîn de yenê rotene. Cayo tewr bi baş keye yo. Qanûnê înfazî ame amadekerdene la domanê ma ci ra feyde nêgînê. No zî nêheqîyê hukmatî ramojneno. Ez veng dana her kesî û wa bêrê ma domananê xo zîndanan ra vejê. Hukmat wazeno zîndanan bikero goristan. La gerek ma destûrê nê çî nêdê. Goreyê ke lajê mi qalî keno, gardîyanî bi hawayêko bêrêz kewenê zere. Ne dûrbîyayîş ra ne zî pakitî ra baldar ê. Eke hukmat tedbîr nêgîro, ma do dest bi çalakîyan bikerê. Ez veng dana pêro dayîkan ke vengê xo bikerê yew."