Elîf Kisa: Peynîya tersî çin a, ganî ma nêtersê   

2020-04-06 09:40:25


	 

	Berîtan Canozer

	 

	AMED - Elîf Kisaya ke hepsîya nêweşe bî û 4 mengî tepişnaye mende, dîyar kerde ke şertê zîndanî baş nîyê û wina vat: "Ma şarê Tirkîyaye ganî vera nêheqî vejîyê. Peynîya tersî çin a. Gerek ma nêtersê. Ma çîyê şaş nêkerê."

	 

	Elîf Kisaya 64 serrî 3ê Kanûna 2019 de Elbîstanê Mereşî de bi sebebê şîya pêvînayîşê hepsîyêke û pere neql kerdib, bi îdiayê ‘hetkarî daya rêxistene' ameye tepiştene. Elîf Kisaye 1ê Nîsane de serbest ameye veradayene. Elîfa ke di domanê ci yew ci ra  giran astengdar o, sereyê tepişnayîşê aye de lajê ci resam Ahmet Kisayî bixêzkerdiş, hewl da ke vengê xo bido eşnawitiş. Roja ke serbest ameye veradayene zî domanê ci bi vilan aye pêşwazî kerde. Elîfe prosesê tepişnayîşê xo wina ercna.

	 

	'Ma serbest ameyî veradayene dima ra reyna ameyî tepişnayene'

	 

	Elîfe vat, verê ke bêro tepiştiş, qerekole de îfade daya û dima ra serbest ameya veradayane. La eynî roje de polîsî ameyê keye û vat: "Ma ameyî keye. Ez şîya serdayîşê cîrana xo ya nêweşe. Ameya keye kes çinbi. Ber padayebi. Ahmet serê silime de bi. Vat, ‘polîsan pîyê mi berdo.' A mabêne de polîsî ameyî. Înan mi tepişna. Ma bi qerarî eşrawitî dadgehe û ma ameyî tepiştiş. Mêrdeyê mi çend rojî ra dima serbest veradayî. Ez zî 4 mengî tepişnaye menda."

	 

	'Muracatê hepsîyan yenê redkerdene'

	 

	Elîfe da zanayene ke hepsîyêka nêweşe ya giran verê aye de bîya û çimêke aye kor bîyo û vat: "Di serrî bi tepişte bî. Rewşa ci baş nêbî. Waştişname nuştêne la ameyne redkerdene. Berdî Dîlok seba dermankerdişî. Rewşa ci seba zîndanî baş nêbî. Cinîyêka wayîrê fehmî bî. Gerek aye zî serbest bêro veradayene. Rewşa ci zîndan de giran bena. No welat, welatê ma pêrûne yo. Ma heme pîya pare kenê? Çira ma pîya pare nêkerê? Çira hende dişminî ma rê yena kerdene. Koxuşê bînan de zî embazê ke rewşa înan xirabo estê. Embaza Leyla bi serran o zîndan de ya. Muebet dayê. Werdêko baş nîno dayene. Emrê înan uca de derbaz bi."

	 

	'Ma bi îmkananê xo pakitî kerdêne'

	 

	Elîfe tewr peyîn qiseykerdişê xo de arde ziwan ke îdareyê zîndanî koxuşan pak nêkeno û vat, hepsî bi îmkananê xo pakîtî kenê û wina qalî kerde: "Seba vîrusî gerek koxuşî biameyne dezenfektekerdene la hema tu çîyêk nêameyo kerdene. Ma çend rey dezenfektan waşt. Ma waştişname nuşt. La netîce nêame girewtene. Zîndano ke ma tede bî, hema hedîseyê vîrusî çinbî. La ma eşnawit ke Mersîn de hepsîyêke/o vîrus ra merda/o. Gerek keyeyî wirzê serê lingan. Ê domanî gunayê. Bêsebeb yenê tepiştene. Gerek şarê Tirkîya vera nêheqî bêveng nêmanê. Peynîya tersî çin a. Gerek ma nêtersê. Ma çîyêko şaş nêkenê."

	 

	Elîfe tewr peyîn qalîkerdene xo de semedê pêro kesê ke seba ci hewl dayê serbest bêra veradayene, înan rê spas kerde."