28 serrî yo ke dimayê lajê xo yo tepişnaye de bajar bi bajar gêrena 2020-05-14 13:42:40   MUŞ - Dayîka hepsîyo bi nameyê Harun Sînîmî ke Zîndanê Tîpa Tyî yê Wanî de tepişte yo, Sabriye Sînîme daye zanayene ke lajê aye 28 serrî yo ke tepişte yo û lajê xo dima bajar bi bajar gêrena.   Harun Sînîmî 31 Teşrîna Peyêne ya 1993î de dewa Eralanî ya Muşî de ame tepiştene û heta nika surgunê xeylê zîndanan ameyo kerdene. Harunî tewr peynî surgunê Zîndanê Tîpa Tyî yê Wanî ame kerdene û 1ê nîsane de tewrê 4 hepsîyanê bînan ame îşkencekerdene. Ame zanayene ke Harun îşkence ra dima rapor girewto û sîyayeyê çimanê ci yê kul 10 rojî yo ke derbaz nêbîyo. Dayîka Harun Sînîmî, Sabriye Sînîme daye zanayene ke 28 serrî yo ke lajê xo dima bajar bi bajar gêrena.   ‘Hepsî yenî îşkencekerdene’   Dayîka Sînîme qiseykerdişê xo de dîyar kerde ke Harun madeyê xo ra nêweş o û wina va: “Harun telefon de mi rê va ‘Zext û îşkence b ima kenî.’ Seba ke ez nêweşa dîyalîzîya verê vîrusî ra zî ez nêeşkaya şêra pêvînayîş. Pêvînayîşê telefonî 20 deqe yo. Zaf kilm o. Ma telefon de zî nêeşkenî her çî bipersî.”   ‘Surgunê xeylê cayan bîyo’   Sînîme dewamê qiseykerdişê xo de ard ziwan ke lajê aye heta nika surgunê xeylê cayan ameyo kerdene û verê ke surgunê Wanî bibo Tekîrdag, Êlih, Bedlîs, Amed, Agirî û Muşî de zî mendo. Dayîka Sînîme sewbîna va: “Seba ke lajê mi nizdî ma de bibo, ma waştişname da la qebul nêkerdî. Kesêk ma çin o ke şêro pêvînayîş. Heta nika xeylê pere seba rayîr şî.”   Dayîka Sînîme tewr peynî dîyar kerde ke mêrdeyê aye 31 Teşrîna Peyêne ya 1993î de netîceyê operasyonêk dewa înan de ameyo binçimkerdene û aye roje ra dima ci ra xebere nêameya girewtene. Sînîme daye zanayene ke qereqol tena kinc û kelûpelanê mêrdeyê aye înan rê şirawito.