Ma pere û TOKÎyan nêwazenê ma keyeyanê xo wazenê! 

2020-05-14 14:12:53


	 

	AMED - Welatîyê Surî yê ke dimayê têkoşînê îdarekarîyê xoser, keyeyanê înan hetê hukmat ra ameyê desteserkerdene û rijnayî waştişê keyeyanê xo kerdî. Welatîyan da zanayene ke heta keyeyê înan nêrê dayene ê do têkoşîn bikerê.

	 

	Serra 2015 de, netîceyê şerê îdarekarîyê xoser de hukmatê OHAL îlan ketd û nê dir xeylêk keyeyî herême de ameyî desteserkerdene û dima ra zî ameyî rijnaye. Mabêne selahîyetdaranê hukmat û welatîyan de pêameyîşêk ame îmzakerdene ke do keyeyî bêrê newekerdene û keyeyan rê bêrê dayene. Dimayê pêameyîşî, Midurîyê Cugeh û Şaristanî no pêameyîş yew teref ra betal kerd. Welatî zî bi amancê protestokerdişê nê qerarî de 8ê Gulane de verê awanîyê Mudirîyê Cugeh û Şaristanî kom bî û vatî ê qerar qebul nêkenê. Keyeyî ameyî mexdurkerdene ajansê ma rê qisey kerdî û dîyar kerdî ke ê do awanîyanê pî û kalanê xo înan rê nêverdê.

	 

	‘6 serrî yo hukmat ma mexdur keno’

	 

	Ayşe İlgine ya ke Taxa Gazî Paşa ya Surî de keyeyê aye estbi wina dîyar kerde: “Ma û domanê xo cuya xo ê kuçeyan de vurna. Ma keyeyê xo wazenê. Bi 6 serrî yo hukmat ma meşgul û mexdûr keno. Ne destûr danê ma awanîyan bivînê, ne zî danê ma. Coka tapoyê înan destê ma de yê. Vatî, ‘ma do keyeyê şima bidê şima’, la hema zî nêdayê. Nika pêameyîşê ke ma dir kerdê yew kîşte ra îpral kerdê. Vanê, ‘TOKÎyan bigîrê’. La ez keyeyêko bîn nêwazena. Ez keyeyê xo û vîyartoxê xo wazena. Wa keyanê ma însanê dewlemendan rê nêroşê, wa bidê ma, ma mexdûr nêkerê. Ma înan ra pere nêwaşto, ma erdê xo waşto. Wa serekwezî û hukmato ke soz da ma, wa pey sozê xo de vinderê.”

	 

	‘Hukmatî keyeyê ma xira kerd’

	 

	Meryem Gormuşe zî da zanayîş ke keyeyê qet zirar nêdîbi û vat dimayê OHALî keyeyê aye ameyê xirakerdene û wina vat: “Keyeyê mi seke qereqole xebitnayê û wexto ke karê înan zî qedîya zî xira kerdî. Eke keyeyê mi amebi xirakerdene zî ez arsaya xo wazena. Ma cayêko bîn nêwazenê. Ma pêameyîşêk îmza kerd. La pêameyîşê ma betal kerdî û dayî zanayene ke do çîyêk nêdê ma û vatî heqê ma yê weçînayîşî çin o. Nika vanê ma do TOKÎyan bidê şima. Ma ne TOKÎyan wazenê û ne zî keyeyêko bîn. Ma ersaya xo wazenê. Xora bi serran o meşgul kenê. Çîyê ma bi zor desteser kerdê. Heta ke nêdê ma ma do têkoşîn bikerê. Ma heqê xo wazenê. Ersayanê xo wazenê. Wa hukmat ma nêşelêno.”