Do serê herra xo de deyndar biciwîyê 

2020-05-16 13:47:52


	 

	WAN - Erdlerzê Wanî ra xeylêk kesî, keyeyê înan Elbaq de rijya û mecbûr mendî ke heywananê xo biroşê û bêrê şaristan. Sanîye Akpinara ke Wan de kîre de ciwîyena, dîyar kerde ke selahîyetdaran piştdayîş nêdayê înan û cayê starbîyayîşî nêdîyê û vat: “Dimayê mengan ra dima, cayê starbîyayîşî dayî la nanê ke ma biwerê nêmend.”

	 

	23ê Sibate de şaristanê Xoyê Îranî de bi pîlîyê 5.9 erdlerz ame meydan û tesîr Elbaqê Wanî zî kerd û rijnayîş virazîya, xeylêk kesî merdî. Seba erdlerzî ke tesîr dewa Xanik, Qaşkol û Elbîsî kerd, 11 welatîyan cuya xo vindî kerdî û seba şert û mercê zimistanî xeylêk welatîyan koçê Wanî kerd.

	 

	Dimayê erdlerzî xeylêk heywanî zî bê stargeh mendibî û xeylêk zî bi tesîrê hewayî telef bîbî. Selahîyetdaran sozê hetkarîye da, la tena werdê rojane û dimayê rojan ra dima çadirî ameyî ronayene. La dewijî mecbûr mendibî koç bikerê. Sewbîna welatîyan heywananê xo yê ke mendibî rotî û nê pereyî dir merkez de keye kîra kerdî.

	 

	Heywananê xo rot û ameye Wan

	 

	Sanîye Akpinara ke mecbûr mende koçê şaristanî bikero wina vat: “30 pesê mi estbî. 5 ci ra serdan ra merdî. Yewin çimeyê debara ma ê bî. Dimayê erdlerzî bi rojan ra dima werd û hîn cilan ardî. Çadiran zî xeylêk erey ardî. Menga Sibate xeylêk serd bî. Merdim nêeşkayîne teber de vindero. Ez bi domananê xo dir çar rojî tebera menda. Soba feyde nêkerdêne. Coka ma pesê xo rot û ma ameyî şaristan. Ma taxa Îskeleyî de keyeyêk kîra kerd. Ma 25 pesê xo bi 10 hezarî rot. Ma bi nê pereyî debara xo kenî. Her menge ez 500 TL kîra dana. Ma cayê starbîyayîşî dî, la nanê ke ma biwerê nêmend. Ma wazenê agêrê dewa xo. Nika vanê awanî do bêrê viraştene. Bi 180 hezarî awanî viraznenê. Ez pere çara bîyara. Seba ke çîyêko ez pê debara xo bikera nêmend, nika zehmetî ancena.”