Enqere de 350 keyeyî bî wayûbirayî: Ma do paştdayîşê xo dewam bikerî 2020-05-16 15:11:46   Dîlan Babat   ENQERE - Endama Meclîsê Cinîyan ê HDPyî Denîz Akîle derheqê kampanyaya ‘Wayûbirayî’ ke Enqere de dewam kena zanayîş da û dîyar kerde ke heta nika bi 350 ra zêdeyêr keyeyan dir ameyê têhet û vat: “Ma mabêne şaran de cîyayîyan nêkenê, nasnameyan nêewnîyenê û bi têkoşîn do merdimî destê xo bidê yewbînan.”   Semedê vîrusê korona bi di mengî yo vengdayîşê ‘keyeyê xo de bê’ yenê kerdene. Welatî seba ke xo vîrus ra bipawê, keyeyê xo de manenê û feqîrî û betalî ra bi hezaran keyeyê ke nêeşkenê kîra, faturayanê xo bidê estê. Nê prosesî de xeylêk partîyanê muxalîfan û şaredarîyan paketê hetkarîye amade kerdî û hewl dayî ke xo biresnê keyeyan la îqtîdarî asteng kerd. HDPyî nê prosesî de kampanyaya ‘wayûbirayî’ da destpûkerdene û paştdayîş seba keye, cinî, kedkar û multecîyan dewam keno.   ‘Betalî resa sewîyeyêka pîl’   Endama Meclîsê Cinîyan ê HDPyî Denîz Akîle qalê xebatanê Enqereyî kerde û dîyar kerde ke kampanya her ke şona pîl bena û heta nika xo resnayê 350 zêdeyêr keyeyan û seba 400 keyeyan zî kolîyê hetkarîye amade kerdê. Denîze wina vat: “Telefonê ke ma rê yenê, hûmara betalan xeylêk zêde ya. Ma bi giranî keyeyê ke betal mendê geyrenê. Ma nêeşkenê problemê betalî çareser bikerê, la qet nêbo ma nê prosesî de paştdayîş de yê. Ma bi paştdayîşê xo bi înan danê hîskerdene HDP verê înan de yo. Ma hewl danê nê rojan dest bidê yewbînan. Heto bîn ra zî keyeyê ke paştdayîş danê, bi keyeyanê hewcedaran dir yenê têhet.”   ‘Her ke wareyê şîdetî zêde beno faşîzm zî aver şono’   Denîze da zanayene ke xeylêk keyeyê ke koçber kerfê muracat kenê û wina vat: “Multecî paştdayîş vînenê û xo tena hîs nêkenê. Hetkarîyê komeleyê dewlete qalî kenê çin ê, multecî vêşanî dir yenê rî bi rî. Betalî do rojê ameyox de xo boresno sewîyeyêka pîl. Asayeno ke do reyna cinî mexdur bibê. Cinî seba nasnameyê xo mecbûr manenê ke bi pereyêko kêm bixebityê. Multecî seke hêzê kar ê erjan yenê vînayene. Seba nê îhlalkerdeyê heqan zêde beno û faşizm zî aver şono. Vera nê yewin rayîr têkoşîn o. Ganî muxalefet têhet de bo. Ma nêrê têhet do no zî nêro çareserkerdene. Ma nêeşkenê bi hewayêko bîn nê krîzî ra vejîyê. Ma do destê xo bidê yewbînan û paştdayîşê xo wina dewam bikerê.”