Eren Keskîn: Na kanperestîya dewlete ya 2020-05-18 13:13:27   Safîye Alagaş   STENBOL- Hemsereka Pêroyî ya ÎHDyî Eren Keskîne bi serran o ke hemverê binpaykerdişan de têkoşîn dana û bi kamîya xo ya pawitişê heqê merdiman yena zanayene. Erene dîyar kerde ke vindîkerdiş adetê Teşkîleyî Mahsusî yo ke hata ewro ameyo û kamperestîya dewlete yo.   Hemsereka Pêroyî ya Komeleya Heqê Merdiman (ÎHD) Eren Keskîne derheqê 17-31ê Gulanê Hewteyê Têkoşînê Mîyanneteweyî yê Vindîkerdiş û Tepiştişan de qisey kerde. Erene qiseykerdişê xo de daye zanayene ke cografyaya ma tede cuyenî de raybazê vindîkerdişê wextê Qirkerdişê Ermenîyan (1915), Suryanî û Xiristîyanan de destpê keno û wina va: “No suc hetê Tekşîlati Mahsusî ra ame awankerdene û hetê teşkîlato taybet ra kerdene. Çarçeweya nê sucan de aqûbetê xeylê cenazeyan nîno zanayene. Nê sucî gam bi gam ameyî kerdene. La tewr zêde 1990î de pê ame. Zihnîyetê dewlete nê sucan pê ard. Ma eşkenî înan rê vajî JÎTEM, kontra gerîla, ya zî dewleta xorîne.”   ‘Aktorê muhîmî yê polîtîkayê taybet hetê îqtîdarî de yî’   Erene dewamê qiseykerdişê xo de ard ziwan ke heta nika sucdarê vindîbîyayeyan nêameyî vînayene û va: “Aktorê muhîmî yê polîtîkayê vindîkerdişanê serra 1990î ewro hetê îqtîdarî de ca gênî. Ewro reyna dîmenê ke kamperestîya Teşkîlatî Mahsusî kenî vîr, yenî kerdene. Taybet zî tay rêxistinbîyayîşê sey Ocaxê Ulku, Ocaxê Alperen û SADATî ke yenî awankerdene ters virazenî. Yanî bi eşkera tehdît kenî.”   ‘No polîtîkayê dewlete yo’   Erene qiseykerdişê xo de daye zanayene ke binê çiman de vindîkerdiş, çinkerdiş û polîtîkayê tersnayîşî parçeyê polîtîkayê dewlete ra yî û wina dewam kerde: “Seba ke no polîtîkayê dewlete yo, Tirkîya îmze nêeşte Pêkerdişê Binêçiman de Vindîkerdişî yê Neteweyê Yewbîyaye (NY) yan.”   ‘Dayîkê Şeme çalakîya tewrê meşru virazenî’   Erene tewr peynî bale ante têkoşînê Dayîkê Şemeyan ser o û vat ke çimeyê têkoşînê dayîkan ÎHD yo û qiseykerdişê xo wina qedênaye: “Netîceyê kombîyayîşê ke ÎHD de ameyî kerdene de vejîya raşte ke Dayîkê Şeme sey awanbîyayîşêk î. Dayîkê Şeme serra 1995î de çalakîya sivîl ya tewr meşru dayî destpê kerdene. Dewlete ge-ge no meşrubîyayîşî qebul nêkerde. Her çiqas ke astengî bibî zî raştîya vindîbîyayeyan pêroyê dinya de ame zanayene.”