Yuksel Almaze: Hêrişê serê goristanan fehmê hukmatî eşkera keno’ 

2020-05-18 14:02:54


	 

	AMED - Hemsereka MEBYA-DERî Yuksel Almaze derheqê hêrişê serê goristanê şehîdan de yenê kerdene qisey kerde û wina va: “Hêrişê goran kenê. Wazenê bi nê rengî hîs û hêvîyê keyeyan bişiknê. Bi serran o nê hêrişî cîya cîya yenê kerdene. Ma xerîbê nê hêrişan nîyê. Fehmê hukmatî tîya de eşkera yo. Wazenê kurdan bi erjê înan bidê şiknayene.”

	 

	Mîyanê mengêke de hêrişê xeylêk goristananê şehîdê PKKyijan ame kerdene. Şaristananê Colemêrg, Wan, Mûş, Êlih, Çewlik û Şirnexî de qereqolan, keyeyan tehdîd kerd, goristananê merdeyê înan texrîp kerdî û rijnayî. Coka goreyê madeyê qanûnê bingeyîn yê hûmara 13, 15, 17 û 20ine hêrişê hikmatî serê goristanan de suc yenê qebulkerdene. Hemsereka Komeleya Kultur û Yewîye ya Paştdayîşî û Hetkarîya bi Keyeyê Merdimanê Xo Medenîyet ra Vindî Kerdê (MEBYA-DER ) Yuksel Almaze derheqê tehdîd û hêrişanê hukmatî serê goristanan de qisey kerde û va, no nêzdîbîyayîş nîşaneyê fehmê hukmatî yê hemverê kurdan o.

	 

	‘Hêrişî her wext dewam de yê, tena metod yeno vurnayene’

	  

	Yuksele va, hêrişanê hukmatê Tirkîya ra xerîb nîyê, hêrişê înan her wext dewam kenê û tena metodê înan vuryeno. Yuksele wina dewam kerde: “Hukmatî bîyayîşê ma, ziwanê ma, nasnameyê ma qedexe kerd. Her roje serê erjanê ma rê hêriş kerdî. Ewro zî hêrişê goranê merdoxanê ma kenê. Qehremanê seke Şêx Seîdî zî ameyî qetilkerdene û nêverdayî serê na herre de bêrê nimtene ke bi hezaran cangorî bi eynî rengî ameyî qetilkerdene. Erja şehîdan ma rê zaf pîl a. Îqtidaro ke hesasîyetê kurdan nê hetî ra zano, hêrişan keno. Hemverê înan de nêrazîbîyayîşê ma zî bi. Hemverê hêrişê goristanan de keyeyê şehîdan, xoverdayîşêko pîl danê. Bi tehdîd, kiştiş, talankerdiş û tepiştişê înan de qet fek dewa xo ra vera nêdayî.”

	 

	‘Rijnayîşê goristanan suc o’

	 

	Yuksele va nê hêrişê goristanan, goreyê qanûnênê Tirkîya suc yeno qebulkerdene û wina va: “Hêrişê goran, qickewtişê hukmatî yo. Nê kerdene, ne dîn, netew û nîjadî de estê. Her cayê dinya de merdeyan rê rêze yena girewtene. La eke ti kurd bê û ti bimirê zî destê xo bedenê to ra nêancenê. Eke şer zî bêro kerdene, gerek şerêko bi şeref bo. Nê çîyê ke yenê kerdene nameyê gerek bivurnê û nêvajê şer, vajê wehşet. Ganî heme kesê bi wijdan, komeleyê ma yê sivîl û partîyê sîyasî vera nê hêrişan polîtîkayanê xo aver berê. Xora keyeyê ma seba nê amade yê. Ganî ma paştdayîş bidê keyeyanê xo.”

	 

	‘Wa problemêko qij de zî keyeyî xo biresnê MEBYA-DERî’

	 

	Yuksele tewr peyîn qalîkerdişê xo de wina va: “Nê demê peyînan de, ma serdayîşê pêro keyeyanê xo kerd. Ma seke komele şî û HDP ma dir ame serdayîşan. Muşahedeyê ke ma kerd, rastî de zî zerrî veşnayîne. Xeylêk keyeyan tehdîd kerdê. Hukmatî vato, ‘ma do domananê şima bi tepişnê, ma do şima rehet nêverdê. Eke şima bi xo goristanan xira nêkerê, ma do tewr xirab bikerê.’ Gama ke dayîkan nê vatişan vatêne, çimê înan bîne pirrî hesrî. Eke tehdîsêko winasî ame kerdene, ma rica kenê keyeyî xo biresnê ma. Tehdîd yan zî hêriş suc o. Goreyê qanûnî heqêko winasî çin o. Problemêko qij de zî wa bizanê ke tena nîyê, xo biresnê MEBYA-DERî. Goreyê nê çi destê ma ra bêro ma do bikerî û ma do hêrişan rê bibê cewab.”