'Vera ke tacîzkar bêrê cezakerdene yenê xelatkerdene' 

2020-06-06 15:32:49


	 

	AMED - Kuçeyanê Amedî de camêrdan hêrişê cinsî yê vera domanan de persê ma cewab kerdî û vatî: "Vera ke tacîzkar û hêrişkar bêrê cezakerdene, yenê xelatkerdene. Ganî no suc nîno efûkerdene û ganî bi hewayêko tewr giran bêrê cezakerdene."

	 

	Dimayê ke qanûnê înfazî ame bi ca ardene, bi hezaran hepsîyê edlî prosesê vîrusê koronayî de serbest ameyî veradayene. No qanûn semedê cinîyan xetereyêko pîl o. Eynî wextî de nêzdîyê 4 serrî yo zî pêameyîşê qanûnî efûkerdişê tecawizkaran rojeve de yo. Goreyê pêameyîşî qanûnê tecawizkarê domanan bi rayîrê zewicnayîşî do bêrê efûkerdene. Na babete hetê sazgeh û dezgehê cinîyan û sîyasetmedarê cinîyan dir xeylêk rey ame munaqeşekerdene. Ma waşt derheqê na babete de şîroveyê camêrdan zî bigîrê.

	 

	Mesut Gever: Nê qanûnê ke yenê amadekerdene, fehmê hukmatî eşkera keno. Bi serbest veradayîşê kesê tacîzkaran dir paştdayîş danê sucdaran. Mêrdeyo ke seba sebebê koronoyî zîndan ra vejîya, roja yewin de cinîya xo û kêna xo ya 7 serrî qetil kerd. Nê paketanê hukmî de bêtêduştîyêk esto. No zî babetêko girîng o. Kesê ke ziwanê xo pawitê, bi serran ê zîndan de yê û qanûnê înfazî ra feyde nêgirewtî.

	 

	Bayram Bakişkan: Sîstem her wext hetê hêrişî yo. Yê ke têduştî wazenê, rastê hêrişî yenê, seke komeleya cinîyan. Ganî şar vera nê vengê xo berz bikero. Seba ke ma zî vera nê çîyan bêveng manenê, ma zî sucdar ê.

	 

	Yilmaz Şîmşek: Dewlete nê çî qebul kena. La ma qebûl nêkenê, ganî hukmat nê het ra bi hîsgêr nêzdî bibo.

	 

	Mevlud Gencer: Verê her çî, efûkerdişê nê kesan do bibo sebebê reynakerdişê nê sucan. Seba nê komelî de na hedîse baş nîya. Tîya de ganî hukmat bikewo mabêne. Êyê ke destê ma ra yeno, teşîrkerdişê tacîzkar û bîyayîşê astengî yo. No zî heta cayêk ma eşkenê bibê asteng.

	 

	Ehmed Akçay: Vanê ke do bi zewacî dir tecawizkarî bêrê efûkerdene, tîya de her çî bêwaştişê domane/î yeno kerdene. Taciz û desteştiş goreyê heme dînan û komeleyan çîyo tewr xirab o. No suc nîno efukerdene. Ganî bi hewayêko tewr giran bêro cezakerdene êdî nê çî nêkerê.

	 

	Hîsametîn Şen: Êyê ke nê kesan ceza nêkenê, embazê înan ê û paştdayîş danê tacizkaran. Ganî bêrê cezakerdene, ma seke welatîyêk nê çî raşt nêvînenê. La hukmat têduşt tênêgeyreno. Tena kesê ke exlaqê komelî xira kenê, yenê efûkerdene.

	 

	Sidik Uvey: Hukmat bi girewtişê qerarêk wina dir şaşîya tewr pîl keno, do cuya komelî zî bikewo tehluke. Ma vera nê qerarî yê.

	 

	Evren Kilinç: Tacîz û tecawiz sucê merdimayî yo û efûkerdişê no sucî zî suc o tewr pîl o. Ê kesê ke zirar danê derûdor û heqê merdiman, ganî efûkerdiş ra feyde nêgîrê. La ma vînenê ke ê kesî efû ra feude gênê û dima ra zî reyna eynî sucan kenê. Ganî rayîr vera nê çî bêrê girewtene.

	 

	Evdilbasit Uzen: Bi zewacî dir efûkerdiş nîno qebulkerdene. Ganî no kes bi hewayêk tewr giran bêrê cezakerdene û zîndan ra nêvejîyê.