Dayîka Aştîye Leyla Aslan: Wa ciwanî nêmirê 

2020-06-07 14:23:13


	 

	AMED - Kurdîstan de proseso tewr giran de dayîkê kurdî seba aşitîyêka mende bi serran o têkoşîn kenê. Leyla Aslane zî nînan ra yew a. Dayîka Leyla arde ziwan ke înan her wext destê xo dergê aştîye kerdo, la no dest her wext veng mendo û va: "Wa ciwanî nêmirê."

	 

	Tirkîya û Kurdistanî de prosesê tewr giran û zehmet de bi serran o rayberîya têkoşînê seba azadî û aşitîye, Dayîkê Aşitîye kenê. Nînan ra yew zî dayîka Leyla Aslan (60) ya. Dayîka Leyla 15 serrî yo seba aşitîyêke mende Amed de mîyanê xebatê Dayîkanê Aşitîye de ca gêna. Dayîka Leyla prosesê tewr giran de barê aşitîye dayo serê milê xo û heta roja ma ya ewro, seba aşitîyêka bi rûmet tekoşîn daya û têkoşînê xo dewam kena. Dayîka Leyla dîyar kerde ke şert û mercê tewr giran de înan aşitî waşt û vat ke a bizano ke do oxirê aşitîye şîyayîşê înan bibo, ameyîşê înan çinbo zî ê do reyna fek têkoşînê xo ra vera nêdê.

	 

	'Pêwa heme zulm û zordarî mi qetî şer nêwaşt'

	 

	Dayîka Leyla dîyar kerde ke mîyanê şert û mercê tewr giran de înan xo ver da û va: "Ez dewêka girêdayê qezaya Hezzoyî de ameya dinya. Dima ra zî ma uca ra derbazê Sasonî bî. Ez 14 serrîya xo de ameya zewicnayene. Emrê 22 serrî de bîya dayîka 4 domanan. Dewe de her kar serê paşte mi de bi. Her kar mi kerdêne. Mi her wext vatêne bextê camêrdan çin o. Mi zaf zehmetî ant. Wexto ke  ciwan bîya û dayîka 4 domanan bîya, mêrdeyê mi qezayêke de dinyaya xo bedilna. Dimayê ke mêrdeyê mi cuya xo vindî kerd, barê keyeyî û 4 domanî serê milê mi de mendî û zaf zehmetî ant. Serra 1990 heta 93an ma dewêka girêdayê Ferqînî de mendî. Nê 3 serran de leşkeran her roj eşt serê keyeyê ma. Rojêke dewe de pêrodayîş vejîya. Cinîyê dewe heme keyeyêk de kom bî. Nê serran de domanê min o tewr qij 3 serre bi. Leşkeran derûdorê dewe padayî û mi û domananê mi ra vatî, "Dewe de terorîst estê” lajê mi zî bi tirkî ci ra va, mi çîyêk nêdîyo. Gama ke lajê mi nê cewabî da leşkerî hêriş kerd. Wexto ke hêrişê lajê mi kerd, ez zî nê çî ra hêrs bîya û mi reaksîyon ramojna. Gama ke mi reaksîyon ramojna, kulmêk dayî mi ro. Bi qasê serrêke ez keye ra nêvejîyaya. Dewa Ferqînî de merdimî mi çinbî. Mi zî qerar da ke ez domananê xo berî şêrî dewa xo. Wexto ke ez şîya dewe, a roje dewa ma ameye veşnayene. Bi 26 serrî yo ez Amed de ya. Vera heme zulm û zordarî mi qetî şer nêweşt. Ma dayîkan her şert û mercan de vat aşitî û bi 15 serrî yo ez mîyanê Dayîkê Aşitîye de bêmabên dewam kena."

	 

	'Ma her wext aşitîye ra amade yê'

	 

	Leyla dewam de wina va: "Wextê grevê veşanî de ma dayîkî hedefê dewlete de bî. Tu serrî bi qasê nê serran waştişê aşitîye hende nêame îhlalkerdene. Prosesê tewr giran de dayîkan rayberî kerd. Her wextî de ma destê aşitîye derg kerd. La çi heyf dewlete her wext destê ma veng verda. Her şert û mercan de ma seba aştîye amade yê. Ma se kenê vernîya ma gênê. Ma aştîye rê amade yê. Ez nêweş a la wexto ke ez yena Meclisê Dayîkanê Aşitîye ez nêweşîya xo xo vîr ra kena."

	 

	'Ma do her waştişê xo dubare bikerê'

	 

	Leyla dewam de arde ziwan ke oxirê aşitîye de bimirê zî do reyna têkoşînê xo dewam bikerê û va: "Ma fek têkoşînê xo ra vera nêdanê. Ma pey têkoşînê domananê xo û şarê xo yê. Semedê xatirê înan ma vanê wa gonî nêrişîyo. Ma destê xo derg bikerê, destê ma tira bikerê zî ma do reyna destê xo derg bikerê. Ma reyna vanê, wa merg çinbo, kiştiş çinbo û wa tepiştiş çinbo."

	 

	'Wa ciwanî nêmirê'

	 

	Dayîka Leyla qiseykerdişê xo wina qedêna: "Wa pêro cinî bibê yew û bi waştişê aşitîye û azadîye biherikyê wareyan. Pêro cinîyê dinya wa biherikyê kuçeyan û vajê şarê dinya rê aşitîye wazenê. Wa tu merdim nêro kiştiş û nêmiro. Qey heyf nîyo ke ciwanê ma kewenê binê erdan. Wa ciwanî nêmirê."