'Awe çin a la fatureyê awe yeno' 

2020-06-10 14:00:14


	 

	WAN - Welatîyê taxa Yalimeleza Wanî de ciwîyenê, dîyar kerdî ke dimayê qeyûman awe ameya birnayene û bi kîlometreyan cayê dûrî ra awe anê keyeyanê xo.

	 

	Taxa Yalimelezî ya qezaya Rayîrê Armûşî ya Wanî de welatî problemê awe ciwîyenê. Welatîyan dîyar kerdî ke bi 4 serrî yo awe înan her wext yena birnayene û pak nîya û va dimayê qeyûman no problem rî dayo. Welatîyan da zanayene ke bi desan rey muracatê Îdareyê Kanalîzasyon û Awe ya Wanî û yewîneyê şaredarî kerdê la tu çareserî nêameyo vînayene û vatî ê mecbûr mendê ke bi bîdonan awe biancê.

	 

	Eyde Dayane arde dîyar kerde hênîyê serê rayîrê Qelqelî zî qilê koyanê Erekî awe anê û reaksîyonê xo ramojna û vat, ganî no problemê awe bêro çareserkerdene. Heme Dayare zî dîyar kerde ke ê nêeşkenê çîyêk zî bikerê û vat: "Her serre selahîyetdarî 4-5 rey yenê taxa ma. Hênîyan kontrol kenê û tu çare nêvînenê." Esmer Dayane zî arde ziwan ke bi mengan o awe înan çin a û vat, ganî problemê awe bêro çareserkerdene.

	 

	Hatîce Dayane zî wina va: "Ma seba hewcedarîyê xo sebze her ca de remna. La bostanê ma wişk bi. Seba ke awe çin a, ma nêeşkenê cilan bişuyê. Ez roje de di, hîrê rey bi bîdonan awe ana. Cilan bi destan şuna. 6 domanê mi estê. Bi hewteyan ma nêeşkenê sereyê înan bişu. Ma cinî seba ke giranî wedarnenê, fitiq paşte ma de virazya. No nîno qebulkerdene."

	 

	Fazîlet Dage zî dîyar kerde ke hema tehdîdê vîrusî dewam keno û wina va: "Eke ma vîrus bikewê, berpirsîyarê ci şaredarî ya. Ma do şaredarî gerre bikerê. Gelo ê eşkenê, rojêke bê awe bicuwî yê? 4 serrî yo ma wina ciwîyenê." Suphan Dumane zî reaksîyon ramojna û arde ziwan ke verê problemê winasî çinbî. Dimayê qeyûman, nê problemî vejîyayê.

	 

	Ayşe Dumane zî va ke pêwa awe înan nîna, her menge fatureyê înan yeno û wina vat: "Awe çin a la 600 TL faturayê awe kewto pê ser. Ma keya geyrenê, selahîyetdaranê VASKÎ gyerenê la tu kes eleqeder nêbeno. Eke awe ma biameyne, fatureyî qet girîng nêbî."