‘Kuçe bi kuçe pêvînayîşê bi cinîyan dir dewam keno’ 2020-07-27 12:29:14   WAN - Hemsereka HDPyî Tuşbayî Edîbe Babure dîyar kerd ke çarçewaya kampanyaya ‘têkoşînê cinîyan her ca de yo’ Meclîsê Cinîyan ê HDPyî de xeylê bername bi ca ardê û vat, dimayê kampanya zî do cinîyan dir bêrê têhet.   Meclîsê Cinîyan ê HDPyî vera şîdet û kiştişê hemverê cinîyan û îstîsmarê domanan 8ê Adare de starê kampanyaya ‘têkoşînê cinîyan her ca de yo’ da destpêkerdene û fînalê ci 28ê Temmuze de do Enqere de bo. Cinîyan seranserê kampanya de polîtîkayê hemverê cinîyan teşhîr kerdî do pêvînayîşê xo tîya ra tepya zî dewam bikerê. Hemsereka HDPyî Tuşba ya Wanî Edîbe Babur û endama meclîsê cinîyan ê HDPyî ya şaredarîya Tuşbayî Devlet Çîftçî prosesê kampanya ercna.   ‘Ma vînenê ke seba cinîyan huqûq bi ca nêanê’   Edîbe Babure, bale ante serê hêrişê cinsî yê leşkeran û wina vat: “Sebebê îstîsmar û kiştişê cinîyan netîceyê polîtîkayê îqtîdarî yo. Polîtîkayê îqtîdarê AKPyî şîdetê camêrdan meşrû keno. Sere ra ma vînenê ke seba cinîyan huqûq bi ca nêanê. Ma zanê ke heqê domanêk rastê îstîsmarî bêro nîno pawitene. Eşkenê domanan bikşê, îstîsmar bikerê. La ma do Meclisê Cinîyan ê HDPyî û sey TJA nê polîtîkayan qebûl nêkerê.”   ‘Sebebê kiştişê cinîyan hêzo ke îqtîdar dano camêrdan o’   Edîbe derheqê kampanyaya ‘têkoşînê cinîyan her ca de yo’ de qiaey kerd û vat: “Ma seranserê Wanî de kampanya xo bi rayrayîşê Agirî de peynî kerd. Sebebê Agirî de ame kerdene o bi ke uca de 6 cinî bi hawayêko guman cuya xo vindî kerdî. Sebebê merdişê 6 cinîyan zî netîceyê nêzdîbîyayîşê dewlete ya hemverê cinîyan o. Ewro qetilkerdişê hende cinîyan hêzo ke îqtîdar dano camêrdan yeno. Cinî sey malê camêrdan yenê ramojnayene.”   ‘Ma fek têkoşîn ra vera nêdanê’   Devlet Çîftçîye zî dîyar kerd ke do pêvînayîşê cinîyan dewam bikero û wina vat: “Ganî ma heme cinî bibê yew û destûr nêdanê qetilkerdişê cinîyan. Cinîyê ke semedê heqê cinîyan û domanan têkoşîn kenê yenê destbendkerdene û tepiştene. Bi nê wazenê bitersnê. Ma qetî fek têkoşîn ra vera nêdanê.”