
Dayîka Dozgîn Temoye ra vengdayîş: Serbest vera bidê  

2020-07-27 13:05:31


	&nbsp;

	Binevş Sarya

	&nbsp;

	KOBANÊ - Dozgîn Temo (Çîçek Kobanê) ke hetê SMO ra ameye desteserkerdene û bi birîndarî teslîmê Tirkîya ameye kerdene, hîrê sûcê cîya ra yena muhakemekerdene û roniştişê diyîn zî serê sibayî bêro vînayene. Verê roniştişî dayîka aye Wehîde Osmane vengdayîşê, ‘Kênaya mi vera çeteyan xo pawit. Aye serbest vera bidê.” Kerd.

	&nbsp;

	Hêrişê ke Tirkîya û komê girêdayê ci Vakûr û Rojhelatê Sûrîye de dewa Mişrefa ya girêdayê Eyn Îsa dabî destpêkerdene, Dozgîn Temoye (Çîçek Koban) 21ê teşrîna verêne 2019 de hetê Artêşa Neteweyî ya Sûrîye ra amebî tepiştene. Dozgîne bi birîndarî teslîmê Tirkîya amebî kerdene û dima ra erşawitibî zîndanê Tîpê T yê Rihayî. Derheqê Dozgîne de pêwa ke serê herra Tirkîya de nêbî bi îdiaya ‘qestî kes kiştiş’, ‘endamîya rêxistinê terorî’ û ‘xirakerdişê yewîya welat’ îdianame ame amadekerdene. Roniştişê yewin 2ê Hezîrane de 5in Dadgeha Cezaya Giran ya Rihayî de amebi vînayene.

	&nbsp;

	Verê roniştişî keyeyî ra vengdayîş

	&nbsp;

	Roniştişê diyîn ê Dozgîne do siba bêro vînayene. Keyeyê ci ame dersînorkerdene û Kobanê de bi ca bi, verê roniştişî vengdayîşê kênaya xo kerd.

	&nbsp;

	‘Îfadeyê aye ambulanse de ame girewtene’

	&nbsp;

	Day Dozgînê, Wehîde Osmane, fîyar kerd ke tepiştişê kênaya xo televîzyon û çapemenîya komelî ra mûsaya û vat: “Ma bi îmkananê xo avûkat girewt û ma şî pêvînayîş. Kênaya mi cayêko binê erdî de girewtêne. Gama ke ma ewnîyayî lingê aye çepe birîndar bîbî. Dermankerdişêko cidî nêkerdibî. Serê zorê ma û avûkatî, Çîçeke girewtî emelîyat. Dima ra platîn kerdî lingê aye. Îfadeyê aye ambulanse de ame girewtene û dima ra ameye tepiştene. Keyeyê ma her wext ame tacîzkerdene. Polîsî rojêke ameyî lajê mi berdî. Derb kerdî û dayî sînorê Kobanî. Pere û hacetê ci desteser kerdî. Dimayê ke mêrde û lajê mi dersînor kerdî, mi zî domananê xo girewt û ez derbaz bîya. Ma serê Cerablusî ra şîne. La çeteyan fîdye waşt. Ma da û ma derbaz bî.”

	&nbsp;

	‘Kêna mi vera çeteyan xo pawit’

	&nbsp;

	Wehîde dîyar kerd ke sûcê kênaya ci çinbî û wina vat: “Kênaya mi û heme hepsîyê sîyasî bêrê veradayene. Prosesê vîrusî de hepsîyê sîyasî zîndanan de mendî. Her hewte kênaya xo dir 20 deqe qisey kena. Vana ez baş a, la ma do senî bawer bikerî. Ma seba na rewşe endîşeyîn ê. Ma wazenê kênaya ma serbest bêra veradayene.”

	&nbsp;