Yê ke bi ramitiş û pesdewarî dir eleqedar benê nuqtayê alternatîf ê rotişî wazenê 

2020-07-27 14:38:59


	 

	DÊRSIM - Cinîyê ke dewe de cuya xo dewam kenê, veng dayî ke seba kesê ke ramitiş û pesdewarî dir eleqedar benê, nuqtayê rotişî bêrê awankerdene û paştdayîş bêro dayene.

	 

	Welatîyê ke şaristananê metropolî tercîh nêkenê, xoza tercîh kenê û dewa xo de bi ramitiş û pesdewarî dir debara xo kenê. La prosesê pandemîyî de seba alternatîf çin ê, nêeşkenê berardişê xo biresnê şarî. Cinîyê dewa Xiyçiyanî ya Mezgîrtî ya Dêrsimî de ciwîyenê, dîyar kerdî ke seba paştdayîşê ekonomîye nêgirewtê problemê ekonomîye ciwîyenê û veng dayî seba citkaran paştdayîş bêro dayene.

	 

	‘Ganî paştdayîş bêro dayene’

	 

	Turkan Dogana 60 serrî ke pesdewarî dir eleqedar bena, dîyar kerd ke emrê domanîye de ameya zewicnayene û nika domanê xo yê 20 serrî yo astengdar ra ewnîyena. Turkane derheqê ciwîyayîşî dewe de qisey kerde û vat: “Ma bi pesdewarî dir eleqedar benê. Ma bostan remnenê. Ma bi heskerdiş kenê, bêguman zehmetîyê ci zî estê. Ganî semedê citkaran paştdayîş bêro dayene.”

	 

	‘Ez nêeşkena berardişê xo biroşî’

	 

	Meral Demîra 53 serrî zî wina vat: “Ez karê xo bi heskerdiş kena. Ma bi pesdewarî debara xo kena. Ez serê sibayî rew mangan ancena. Sewbîna şona bostan. Ez bi rotişê şitî debara xo kena. Kar ma rê zehmet yeno la ma ci ra hes kenê. Yewin çimeyê debara ma no yo. Çîyo ke bîn ma bikerê çin o. Ma dewe ra hes kenê. Ma mîyanê xoza de yê. Ma nêeşkenê berardişanê xo her wext biroşê. Seba ka çimeyê ke bîn çin o, ma zehmetîyan ancenê.”

	 

	Selda Demîre zî bale ante serê cuya dewe û vat: “Xoza, ramitiş ma rehet keno la heto bîn ra cuya bajarî de zehmetîyê ci zî estê. Cinî serê sibayî rew wirzenê. Heta ereyî xebetênê. Serê erdan de xebityenê. Xeylê cinî bi heywanan dir eleqedar benê. Bi berardişê înan debara xo kenê.”