Seba vîrusê Koronayî ke Mêrdîn de vila bîyo îqaz! 2020-07-29 14:00:35   MÊRDÎN - Mêrdîn de hûmara kesê ke bi vîrusê koronayî kewtê resayî 5 hezarî û nêweşxane de cayî nêmendî. Verê roşanî Hemsereka Odeya Tabîban a Mêrdînî Dr. Derya Eteme veng da welatîyan kerd û vat nê prosesî de keyeyê xo de bê.   Semedê vîrusê korona Tirkîya de hûmara kesê ke cuya xo vindî kerdî bî 6 hezar. 1ê Hezîrane ra dima bi prosesê normalbîyayîşî die hûmare zêde bî û yew zî bajarê ke hûmara ci zêde bena Mêrdîn o û ame zanayene ke nêweşxane û wargehan de ca nêmemdo. Bajar de heta nika 200 xebatkarê weşîye enfekte bî. Verê roşanê Hemsereka Odeya Tabîban a Mêrdînî Derya Eteme veng da ‘keye de bimanê’ welatîyan.   ‘Hûmara resa 5 hezarî’    Derya wina qal kerd: “Nika nêweşxaneyan de ca nêmendo. Kesê ke testê înan pozîtîf vejîyayo û nêweşê ke rewşa înan giran a zaf ê. Heta nika 200 xebatkarê weşîye ke testê înan pozîtîf vejîyayo estê. Na hûmara de embazê ke rewşa înan giran estbî, la rewşa înan baş bena. Meslegdarê ma ke baş benê û şinê keyeyê xo na rey testê keyeyê înan pozîtîf vejêno. Bi taybet Qoser de hûmare zêde ya. Vîrus heta dewan vila bîyo.”   ‘Wa roşan de her kes keyeyê xo de bibo’   Derya dîyar kerd ke seba nêweşê ke rewşa înan giran a bêrê dermankerdene ganî nêweşxane de baş bibê û wina vat: “Ganî merdimî baldar bê. Na rewşe de ganî dawet û bernameyê qelabalix nêrê organîzekerdene. Ganî dest û rî bêrê dezenfektekerdene. Nêweşê enfekte teber de geyrenê. Bi taybetî ganî welatî roşanan de baldar têbigeyrê.”   ‘Ganî ferqê cîdîyetî de bê’   Derya tewr peyîn qiseykerdişê xo de veng da welatîyan û hukmatî û wina vat: “Wa welatî roşan de keyeyê xo de bê, tedbîrê xo bigîrê. Ganî merdim rojê ameyox de pakitîyê xo û mabêne komelî de baldar bê. Ganî ferqê nê cîdiyetî de bê.”