Medyaya komelî de cigêrayîşê edaletî: Sîstemê hukmî qedîya yo 2020-09-03 13:15:39   Fîlîz Zeyrek   EDENE - Seba derheqê sûcê hemverê cinî, doman û heywenan tehqîqatêk bi tesîr nîno kerdene û gumanbar cezayê ke heq kenê nêgînê, cinîyan serê medyaya komelî de xo rêxistin kerdî û kewtî cigêrayîşê edeletî. Avûkat Sevîl Araci dîyar kerd ke çîyê ke yenê ciwîyene ramojneno ke sîstemê hukmî bêfonksîyon o.   Hêrişê hemverê cinî, heywan û xoza de hukmî de bêceza maneno. Êlih de cinîya bi nameyê Îpek Ere rastê tecawizî amî û dima ra întîxar kerd. Çawîşo Pîspor Musa Orhano ke bi sebebê hedîse, nêame destbendkerdene zî. Dimayê hedîse seba reaksîyonê rayaumumî ame tepiştene. La gumanbar hewteyêk dima ame veradayene.   ‘Ma wazenê ke Pêameyîşê Stenbolî bi ca bîyarê’   Sevîlê wina va: “Rewşêke bi dej esta. Ma vînenê ke heta cinî serê medyaya komelî de nêkewê tevger heq nêgînê, gumanbarî nînê muhakemekerdene û tepiştene. No zî rewşêka bêhukmî ya. Pêameyîşê Stenbolî de xeylê madde estê. Çîyê ke yenê ciwîyene, ganî pêameyîş bi ca bîyarê. Eke bi ca biameyîne, ewro Îpeke nêmerdêne. Ma do serê medyaya komelî de vengê xo heme dinya rê bidê eşnawitiş la ganî hukm zî wezîfeyê xo bi ca bîyaro. Waştişê ma oyo ke Pêameyîşê Stenbolî bi ca bîyarê.”   ‘Çapemenî azad nîya’   Sevîle dîyar kerd ke AKP seba vernîya paştdayîşê cinîyan serê medyaya komelî zêde bîyo, sererastkerdişê newe kerdê caardişan û wina vat: “Ma tîya de vînenê ke nîyet oyo ke vernîya paştdayîşî bêro girewtene. Çi heyf, ma welatêk ke çapemenî azad nîya de ciwîyenê.”   ‘Ma fek heq û cuya xo ra vera nêdanê’   Sevîle tewr peyîn wina vat: “Semedo ke edalet bi ca bêro, tedbîrî bêrê girewtene ganî çapemenîya komelî de kampanya bêro kerdene, Twîtter de hedîse bibê rojeve. Xeylê cinî mecbûr manenê ke serê medyaya komelî de edalet bigeyrê. Ma reyke bîn veng danê, ma qetî fek heq û cuya xo vera nêdanê. Pêameyîşê Stenbolî ney, kiştişan asteng bikerê.”