Muzeyyen Înan: Merdim tehmê bastêqê încîran ra mird nêbeno 

2020-09-05 13:49:14


	 

	Rojda Aydin

	 

	ŞIRNEX - Bajarokê Erebanî yê qezaya Hezexî de Muzeyyena ke baxçe û bostanan de berardiş kena, dîyar kerd ke ganî her kes herre xo rê wayîr vejîyo û berardişêk xozayî bikero.

	 

	Bajarokê Erebanî yê qezaya Hezexî ya Şirnexî de cinîyan bi nameyê Muzeyyen Înan (49) a ke dayîka 9 domanan a, tim karê xoza kerda. Muzeyyena ke karê baxçe û bostanan kena, heme berardişê xo bi metodê xozayî bi ca ana û heme sebze û fêkîyê ke kom kena, semedê zimistanî amade kena. Muzeyyena ke baxçeyê ci de încîrî estê, încîran ra bastêq viraznena. Muzzeyene dîyar kerd ke merdim tehmê bastêqê încîran ra mird nêbeno.

	 

	Muzeyyene dîyar kerd ke baxçeyê înan de încîrî estê û ê pê încîran bastêq viraznenê û wina vat: “Ma menga adare de xizmetê daranê încîran kenê. Vaşê ke mîyanê saran de zergûn benê, semedo ke zirar nêdê daran ma arêdanê. Menga Tebaxe de zî ma arêdayîşê încîran kenê. Ma serê sibayî şonê daran ra încîran arêdanê û anê keye. Ma încîrê ke resenê û rengê înan sûrê, arêdanê. Ma adir tafînenê û beroş danê ser, încîr û şit kena têmîyan. Semedê her kîloyêk încîr, şûşeyêke şitê mangan kena mîyan. Semedo ke încîrî baş bipelixyê ez kena mîyanê robotî. Sewbîna seba tehmi ci hîna weş bo zî vame û gozan kena ci. Dima ra serê potan de yan zî serê kaxêdê firine de bi hawayêko tenik fînena ra. Rojêke erd de verê tîje de maneno û ziwa beno û roja bîn şina hemine kom kena. Bastêqê ma bi no hawa yeno viraştene.”

	 

	‘Viraştişê bastêqê încîran ê engure ra asanêr o’

	 

	Muzeyyene dewam de wina va: “Karê ma zehmet o û ma zaf benê rincan. La wexto ke ma berardiş vejenê werte, ma zaf kêfweş benê. Bi taybetî viraştişê bastêqî zehmet o. Ma şonê binê germê tîje de încîran arêdanê. Heta ma bastêq viraznenê, ma verê adirî de veşênê. Bi taybetî seba ke ez tena ya no kar seba mi zehmet o. Ez tay kena wişk, tay zî kena bastêq. Ez ge-ge merdimanê xo ra zî erşawena. Ma încîran zêde nêkenê bastêq, la seba ke emsar engure tay bî, mi reya ewil o ke kerd bastêq. Viraştişê bastêqê încîran hîna rehet o sey ê engure.”

	 

	‘Ma berardişê sebze û fêkîyan zî kenê’ 

	 

	Muzeyyene dîyar kerd ke ê tena bastêq nêviraznenê û wina vat: “Ma her çîyê xo, bi xo berardiş kenê û ma seba zimistanî zî amadekarî kenê. Mi baxçeyê xo de sebze ramito û baxçeyêk mi de zî xeylê darê fêkîyan estê. Ma qetî sebze û fêkîyan teber ra nêgînê. Ma her çî bi destê xo viraznenê û wenê. Pêro çî ma xozayî yê.”

	 

	‘Ganî ma wayîrê herra xo vejîyê’

	 

	Muzeyyene tewr peyîn vat, cinî biwazo eşkena pêro karan bikero û wina qedêna: “Ganî ma herra xo rê wayîr vejîyê. Ma herra xo de her wext ramitişêko xozayî bikerê.”