Çadiran de cuyêka bêawe: Eke kar bibayîne çira ma tîya bîne 

2020-09-05 14:13:33


	 

	Fîlîz Zeyrek

	 

	EDENE - Cinîyê ke karkerê ramitişî yê û seba debara xo bikerê, binê germê Çukurovayî de têkoşînê cuye danê, çadiran de cuyêka bêawe derbaz kenê û dîyar kerdî ke eke kar bibayîne çira ma tîya bîne. Cinîyê ke kedêke pîl danê zî hemverê keda xo nêgînê.

	 

	Karkerê mewsîmî yê Riha û Amedî sey karkerê ramitişî şî qezaya Karataşî ê Edene, nêzdîyê dewa Çavuşlu de çadirî dayî ro û têkoşînê ciwîyayîşî danê. Cayê ke karkerê ramitişî ciwîyenê, awe çin a. Karkerê ke pêwa problemê ekono î û îhlalkerdişê kede, problemê awe zî ciwîyenê dîyar kerdî ke 9 mengî yo xebityenê, la pereyê ke kewtê destê înan nêeşkenê 3 mengî debara xo bikerê.

	 

	‘Awe çin a’

	 

	Fatma Akça ke nêweşa şekirî ya 7 mengî yo Edene de ya. Fatma dîyar kerd ke lajêke aye astengdar esto û bi di domananê xo dir ameya Edene û seba înan werd amade kena û wina vat: “Pêwa bêawî, vîrus zî vejîya. Cuya ma hîna zehmet bî. Lajêke mi nêweşê gurçikan o û nêvîneno. Domanê verê şitî estê. Ma ewnîyenê înan ra zî. Emrê mi aver şîyo, ma peme arêdanê, eşêfe kenê. Semedo ke îmkanê karî çin ê ma tîya xebityayî.

	 

	Selvî Muslume zî Amed ra ameya Edene. Selvî 2014 de seba hêrişê DAIŞî Kobanê ra yena Amed de bi ca bena. Selvî û keyeyê ci bi 900 TL debara xo kenê û dimayê dewleye nê pereyî zî betal kena, êdî nêeşkenê kîrayê xo bidê û seba nê yenê peme arêdanê. Selvî wina vat: “Ma perîşan bî. Xeylê germ o, pêşû estê. Ma di kesî xebityenê. Qîm nêkeno. Ma do agêrê Amed. Cîranê ma zaf baş ê.”

	 

	‘Gama ke bilusk erzeno domanî tersenê’

	 

	Guneş Aktaşe zî wina vat: “7 mengî yo ma Edene de yê. Ma serê sibayî rew rew wirzenê û vernê de ma awe bar kenê. Ma îsot ramenê, arêdanê û qedênenê dima ra zî agêrenê Riha. Dimayê mengêk ma reyna yenê Edene. Dayîk, pî, waye û birayê ma Riha de yê. Ma înan verdayê û ma ameyî tîya. Ma bi domananê xo dir xebityenê. Ma zimistanî mîyanê herre de yê. Wexto ke bilusk erzenê, domanî xo kenê û tersenê.”

	 

	‘Cuya ma çadire de derbaz bena’

	 

	Rabîa Aktaşe zî dîyar kerd ke aye Riha ra ameya û pêwa 17 serrş ya, 4 serrî yo serê erdan de xebityena û wina va: “Eke Rihayî de kar bibayîne, ez nêameyîne tîya. Xeyala mi oyo ke bibî mamoste. La nika ez tîya ya. Ma bi hawayêko rincan serê erdî ra yenê. Ma bi di, hîrê saetî reyde yenê xebityenê.”

	 

	‘Qezencê ma qîmê 3 mengan nêkeno’

	 

	Fîlîz Unuture zî reaksîyon vera şert û mercan da û arde ziwan ke qetî hemverê keda xo nêgînê û vat: “Roje de 80 TL gênê, ez û 6 domanê xo xebityenê. Qezencê ma yê 9 mengan qîmê 3 mengan nêkeno.”