Dayîkê Aştîye: Eke aştîye waştiş sûc bo ma zî sûcdar ê 

2020-09-05 14:52:35


	 

	Medya Uren

	 

	AMED - Endamê Meclîsê Dayîkê Aştîye reaksîyon vera nêzdîbîyayîşê hemverê Makbûle Ozbeke dayî û vatî: “Makbûle seba dayîkê bînî eynî dej nêancê, her wext mîyanê têkoşînî de bî. La bedelê waştişê aştîye tepiştiş bi. Eke Makbûle sûcdar a, ma zî sûcdar ê.”

	 

	Endamê Meclîsê Dayîkê Aştîye ya 72 serrî Makbûle Ozbeke, Zîndanê Cinîyan ê Amedî de krîzê qelbî derbaz kerd. Makbûle wedaritî Nêweşxaneyê Cigêrayîş û Perwerdê yê Gazî Yaşargîlî. Rewşa dayîka Makbûle seba ke krîtîk bî, vizêr qerarê serbest veradayîşê aye ame dayene. Derheqê babete de endamê Meclîsê Dayîkê Aştîye ajansê ma rê qisey kerdî.

	 

	‘Nê welatî de huqûq çin o’ 

	 

	Raîfe Ozbeke destpêkê qiseykerdişê xo de bale ant serê sîstemê dewlete û vat: “Tirkîya de bi qasê 40 serran ra zêdêr şer û pêrodayîl bê mabên dewam keno. No şer canê ma ra can girewt. Ma ameyî kiştiş û ameyî tepiştiş. La tim waştişê ma aştîye bî. Şima vînenê seba aştîye, seba huqûq merdimî canê xo danê verê mergî. La dad, huqûq û edalet çin o. 7 serre ra heta 70 serre kurdî zîndan de yê. Ne ewnîyenê emrê înan ra zî ne zî ewnîyenê nêweşîye înan ra. Dayîka Makbûle tena yew ê kesan ra ya ke bê huqûq ameya tepiştene. Bi hezaran kurdî bê sûc, eynî emr de kewtê zîndanan û xeylê kesî seba nê mîyanê çar dêsan de dinayaya xo bedilnayî. Ma nêwazenê ke bê huqûq însanî bêrê muhakemekerdene.”

	 

	‘Wazenê ma bêveng bikerê’

	 

	Gulîstan Ereke zî dîyar kerd ke Tirkîya de bi hezaran hêrişkar û tecawuzkar ameyî veradayene û vat: “Ê nika bi eynî hawa sûcê xo dubare kenê. La kesêke aştîye wazenê nika tepişnayeyê. No amancê îqtîdaran eşkera keno. Wazenê kelepçe bidê aştîye ro. Cuya xo de çîyêko ma nêdî nêmend. Her wext amancêke ma bi o zî aştî. Coka ma ra terenê. Dayîka Makbûle a yewin nîya ke rastê muameleyêko yena. Bi se hezaran dayîkê ma wina ciwîyenê. Wazenê înan bêveng bikerê ke êdî aştî nêqîrê. La ma do her wext têkoşînê xo seba aştîye bidê dewamkerdene. Ma do bi înan bidê qebulkerdene.”

	 

	‘Mi dî wa kesêk bîn nêvîno’

	 

	Nazîme Yureke zî qalê vatişê Makbûle kerd û vat: “Dayîka Makbûle her wext vatêne, ‘Kezeba mi veşa, wa ê dayîkê bînan nêveşo. Mi dî wa kesêk bîn nêvîno û coka zî ez o her wext têkoşînê aştîye bidî.’ Dayiîka Makbûle û heme dayîkê ma na xete de yê. Na xeta ma ya sûr bî. Ma seba heme şaran nê çî waştêne, tena seba şarê Kurdî ney. La dewlete vera nêher wext xo kerd ker ûkor. Her wext hêrişêk hemverê dayîkê aştîye esto. Nimûneyê ci zî dayîka Makbûle ya. Û ma vanê eke aştîye sûc a bêrê ma zî bigîrê.”