Pêwa xoverdayîşê keyeyan çadirî ameyî xirakerdene 

2020-09-05 15:36:24


	 

	AMED - Çadirê ke bibî stargehê keyeyan, hetê bi desan cendirme û zabitayan ra ameyî xirakerdene. Hayrîye Demîre reaksîyon vera rijnayîşî da û vat: “Ma awan kenê, şima xira kenê la ez bimirî zî ez tîya ra nêşîna û ez o tîya bî.”

	 

	Dewa Fîsî yê qezaya Licê ya Amedî awanîyê 3 keyeyan 2 rey bi sebebê ke tapûyê înan çin ê û do rayîr bêro viraştene, ameyî xirakerdene. Keyeyan zî hemverê keyeyê ke ameyî xirakerdene, çadirî dayî ro. Ewro bi seyan cendirme û zabitayan girêdayê Şaredariyê Licê ke nika hetê qeyûm ra yeno îdarekerdene, bi makîneyan çadirê ke amebî ronayene, ameyî xirakerdene.

	 

	Keyeyê ke çadirî dabî ro, seba ke nêrê xirakerdene xeylê xo ver dayî, labelê reyna zî çadirî ameyî xirakerdene. Cinîya bi nameyê Hayrîye Demîre heta peynî xo ver da û nêverda ke çîyê ke çadire de yê bêrê vetene. La hetê cendirme û zabiteyan ra ameyî vetene. Sewbîna keyeyî ameyî tehdîtkerdene û ane vatene ke cade uca terk bikerê.

	 

	Hayrîye dimayê xirakerdişê çadiran reaksîyon ramojna û vat: “La şima Homa nas nêkenê? La wijdanî şima zî çin o? Seba ke ma kurd ê nê çî kenê. Wa kurdê ke xo roşenê wa biewnê. Wa no dîmen şima bidejno. Êyê ke keyeyê mi xira kenê terorîst ê. Ez şima efû nêkena, Homa zî şima efû nêkero. Ma aaan kenê, şima xira kenê. La ez bimirî zî ez tîya ra nêşina û ez o tîya bî.”