‘DEDAŞî 10 hezar ceza da mi’ 

2020-09-24 11:09:29


	 

	AMED -  Remzîye Gundogdu ke seba krîzê ekonomî bi zor û zahmetî hewl da ke bi deştiş debara xo bikera û na rey zî sazgehê DEDAŞî bi cezaya 10 hezar TL ke ci rê birna, aye mexdûr kerd. 

	 

	Esnafî, seba krîzê ekonomî yê Tirkîya ke roj bi roje pîl beno û rewşa pandemî de her ke şono bi karê kenê nêeşkenê debara xo bikerê. Nê esnafê ke bi zor û zahmetî hewl danê debara xo bikerê înan ra yew zî Remzîye Gundogdu (53) ya. Remzîye ke hemverê krîzê ekonomî têkoşîn dana û hewl dana ke bi deştiş debara xo bikera û na rey zî hetê Şîrketê Vilakerdişê Ceryanî yê Dîcleyî (DEDAŞ) ra ameye mexdûrkerdene.

	 

	‘Ma debara xo bi no karî kenê’

	 

	Remzîye destpêkê qiseykerdişê xo de serê karê xo de qisey kerde û vat: “Ez 10 serrî yo nê karî kena. Dimayê ke mêrdeyê mi kewt zîndan, seba ke debara keyeyî xo bikerî, mi dest bo karê deştişî kerd. Seba nê karî zanebîyayîş, bawerî û hêz lazim o. Mi zî bi nê hêz û bawerî, karê xo ard heta ewro. Dimayê ke mêrdeyê mi zîndan ra vejîya seba nêweşîya xo nêeşka bixebityo. La hewl dano ke dikan de hetkarîya mi bikero. Seba krîzê ekonomî debare zahmet bîya û ma zî tena debara xo bi nê karî kenê.”

	 

	‘DEDAŞî 10 hezar ceza ma rê birna’

	 

	Remzîye hetêk ra xebate xo kerd û hetêk ra zî qisey kerde. Remzîye wina vat: “A roje xebatkarê DEDAŞî ameyî tîya û vatî, 'aboneyîyê dikanî esto yan ney?’ Mi zî vat, xora wexto ke ma keye viraşt, ma dikan û keye pîya viraşt û şebekeyê înan yew o. La înan vat, 'çira aboneyîyê tîya çin o.’ Mi zî vat, eke lazim keno, ez ê tîya cîya viraznî. La sere de wina ameyo viraştene û faturayê her di hetan zî ez dana. Nê dir hem seba dikan û hem zî seba keyeyî cîya cîya 5 hezar TL ceza birnayî û mi deyndar kerdî. Seba çi hende ceza danê ma? Xora krîzê ekonomî esto û ez zor debara xo kena û xeylê rey zî nêeşkena fatûreyê xo bidî. Sey ke krîz bes nêbo, seba pandemî ma xeylêk wext nêxebityayî û no zî mexdûrîyetê ma zêde kerd. Ma derdê ke senîn debara xo bikerê, sazgehê dewlete DEDAŞ zî derdê ke senîn ma ra bigîro de yo.”

	 

	‘Ez bendeyê cewabê DEDAŞî ya’

	 

	Remzîye dîyar kerd ke aye îtîraz kerdo la selahîyetdarê DEDAŞî ci ra vatê, "hewldanê to bêfeyde yê û wina vat: “Ez dimayê na hedîse şîya DEDAŞ û mi waştişname da. La mi ra vatî, 'ti çi binusê feyde nêkeno'. Ez senîn bikerî nêzana, ez nika bendeyê cewabê DEDAŞyî ya. Ez veng dana selahîyetdaranê dewlete ke wa nê problemî çareser bikerê û serê krîzê ekonomî de wa krîzîk bîn nêviraznê û ma mexdûr nêkerê.”