Bi sebebê keyeyê înan dûr o şaredarî awe nêdana înan  

2020-10-31 14:22:37


	 

	Medya Uren

	 

	MÊRDÎN - Adile Zengina ke bi 4 serrî yo eynî keye de manena, bi sebebê ke qeza ra dûrî ya, hetê Şaredarîya Girdî ya Mêrdîn ra bêawe yena verdayene. Adîle ke vana ê problemê awe û ceyranî ciwîyenê, waşte ke şaredaredarî cewab bido waştişnameyê înan.

	 

	Adîle Zengîn ke keyeyê ci taxa Tûmikî ya Cêr ê girêdayê qezaya Qoserî ya û 4 serrî yo bi sebebê ke keyeyê înan qeza ra dûrî yo, şaredarî înan bê awe verdena.  Adîle û keyeyê xo bi karê ramitişî û pesdewarî dir debara xo kenê. Adîle dîyar kerd ke bi 4 serrî yo seba Daîreyê Awe û Serbê (MARSU) ke girêdayê Şaredarîya Girdî ya Mêrdînî yo waştişname nusenê, la  şaredarî her wext bi sebebê ke keye kuçe ra dûrî yo û nêeşkenê borîyan heta keyeyê înan ronê, nê waştişê înan yeno redkerdene. 

	Adîle reaksîyon vera cewabê şaredarî da û va ke bi serran o bi îmkananê xo problemê xo yê awe û ceryanî çareser kenê.

	 

	‘Ma hawayê şaristanî ra aciz bî’

	 

	Adîle dîyar kerd ke ê ameyê mexdûrkerdene û wina va: “Ma xeylêk derg şaristan de mendî. Ma hawayê ci ra û problemanê ci ra aciz bî. Coka ma verê xo da xoza. Ma tîya dest bi karê citkarî û pesdewarî kerd. Tîya 4 serrê ma qedîya û ma hema zî problemê awe û ceyran ciwîyenê. Ma bi desan rey muracatê  DADAŞ û MARSU kerd. La bi sebebê ke keyeyê ma cehde ra dûrî yo ne awe û ne zî ceyran danê keye. Ma waşt walî dir qisey bikerê, la ma ra vatî şima ancax eşkenê bi randevu qisey bikerê. Bi mengêk û nîm o ma bendeyê ke ci ra randevu bigîrê.”

	 

	‘Wa şaredarî karê xo bikero’

	 

	Adîle reaksîyon vera selahîyetdaran ramojna û va: “Bi serran o ma nê keyeyî de yê û ne awe û ne zî ceyran esto. Bi desan heywanê ke ma wey kenê estê. Bi desan seba nê merdê. Ma debara xo bi pesdewarî û ramitiş kenê. Ma awe cîrananê xo ra gênê. Vanê ke ma xizmet kenê. La 4 serrî yo ma ti xizmetê înan nêdîyo. Ma nêzdîyê merkezî yê. Dewê ke merkez ra dûrî yê xizmet ra feyde gênê. Labelê bi sebebê dûrbîyayîşê ceyran û awe nêdanê ma. Ma îmkanê şaredarî çin o ke borîyan bianco. Ganî şaredarî û walî karê xo bikerê. Ma çareserî wazenê.”

	 

	‘Ma çareserî wazenê’

	 

	Adîle problemê ke ciwîyena pare kerd û va: “Ma wazenê ke waştişê ma bi ca bîyarê. Ma zî ferdê nê komelî yê û heqê ma yê xizmetgirewtişî esto. Şaredarî her roje derheqê xizmetî de serê medyaya komelî de reklamê xo kena. Gelo kamî rê. Çira ma nêdî. Nêzdîyê ma camî esta. Şaredarî heta uca awe û ceyran anta. Keyeyê ma zî kîlometreyêk cehde ra dûrî yo. Ganî borîyan biancê heta keyeyê ma zî û problemanê ma çareser bikerê.”