Tepişteya nêweşe Tenzîle Acar nîna tedawîkerdene 2020-10-31 14:47:00   Rojda Aydin   ŞIRNEX - Tepişteya nêweşe Tenzîle Acara ke Zîndanê Cinîyan ê Bakirkoyê Stenbolî de yena tepiştene, her ke şono rewşa weşîye aye giran bena. Dayîka Tenzîle, Resmiya Acar, ard ziwan ke kênaya aye nîna tedawîkerdene û wina va: "Ne huqûq û ne zî edalet esto. Ganî pêro tepişteyê nêweşî bêrê tehlîyekerdene.”   Zîndanê Tirkîya û Kurdistanî de teda, hêriş û îhlalkerdişê heqan her ke şino zêde beno. Bi taybetî zî bi prosesê pandemî dir tewr zêde yê ke binê şert û mercê zehmet de manenê reyna kesê ke zîndanan de yê. Sere de zî rewşa ra tesîr benê tepişteyê nêweş ê. Sewbîna goreyê dayeyê Komîsyonê Zîndanan ê ÎHDyî zî temamê zîndanan de Tirkîya de 458 tepişteyê nêweş yê ke rewşa înan giran ê estê.   Nînan ra yew zî Tenzîle Acara ke Zîndanê Cinîyan ê Bakirkoyê Stenbolî de yena tepiştene ya. Tenzîle serra 2016 ra tepya zîndan de ya û nêweşîya Hepatît B ci peyda bîya. Dayîka Tenzîle, Resmiya Acar, bale ant serê nêweşîya kêna xo û waşt ke kênaya aye serbest bêra veradayene.   ‘Binê şert û mercê zehmet de ciwîyenê’   Resmiya, reaksîyon vera tedawîyê bi kelepçe da û wina va: “Leşker û polîsî bi tepişteyan dir kewenê odaya muayenî û kelepçe anêkenê. Ê nêeşkenê bi no hawa tedawî bivînê. No bêhuqûqî yo. No zî ramojneno ke edalet çin o. Tenzîle nêweş a û tedawîya ci nîna kerdene. Qirike aye ra gonî yena. Serra 2016 ra nata tepişte ya. Wexto ke ameye destbendkerdene 15 rojan îşkence ci rê yeno kerdene. Tepişteyî binê şert û mercê zehmet de ciwîyenê. Zulm û zordarî bi tepişteyan kenê.”   ‘Ganî pêro nêweşî bêrê tehlîyekerdene’   Resmiya, tewr peyîn qiseykerdişê xo de bale ant serê şubeyê vîrusê korona û dîyar kerd ke zîndanan de tedbîr nînê girewtene û va: "Tepişteyî mergî dir rî bi rî mendî. Edalet ça de yo? Ê zîndan de nêeşkenê xo nêweşî ra bipawê. Tepişteyî bi nê şert û mercê zehmet de senîn xo bipawê? Çîyê ke ma înan rê erşawenê, nêdanê. Kantîn ra çîyê ke gênê, di qatî ê teberî yê. Ne huqûq ne zî edalet esto. Ganî pêro tepişteyê nêweşî bêrê tehlîyekerdene. Seba nêweşî ma nêeşkenê şêrê pêvînayîş. Wexto ke hewteyêk reyke bi telefon ma geyrenê, ma tena o wext eşkenê zanayîş bigîrê. Wa kênaya mi û heme tepişteyê nêweşî bêrê veradayene.”