Dewa Pîremîrî de viraştişê keyeyê kerpîçan dewam keno 

2020-11-01 14:27:13


	 

	Medya Uren 

	 

	MÊRDÎN - Dewa Pîremîrî ke girêdayê qezaya Qoserî ya, viraştişê keyeyê kerpîçan dewam keno. Bi kedêke kolektîf keyeyî yenê viraştene. Cinîyê dewa Pîremîrî mewsîmê payîzî de dest bi sîwaxkerdişê keyeyê xo yê kerpîç kenê.

	 

	Keyeyê ke kerpîçan yenê viraştene, hemverê germ û serdî de xeylêk bi feyde yê. Yan zî hamnanî honik ê û zimistanî zî germ ê. Coka welatîyê ke deşt û beyaran de ciwîyenê seba nê teybetmendîyan, kulturê viraştişê keyeyê kerpîçan danê dewamkerdene. Dewa Piremîrî ya girêdayê qezaya Qoserî yew înan ra ya ke keyeyê kerpîçan de cuya xo dewam kenê.

	 

	‘Verê 40 serrî mi bi destê xo viraşt’

	 

	Keyeyê Hemdîye Bozan bi kerpîç o û bi destê xo viraşto. Domanê Hemdîye zî verê destê aye de xebityenê. No kar mewsîmê payîzî de yeno kerdene. Hemdîye dîyar kerd ke 40 serrî verê bi destê xo nê keyeyê kerpîçan viraştê û va: “Hema domanê mi qij bî, mi nê keyeyî viraştî. La ewro zî domanê mi pîl bîyê û ma pîya viraznenê. Seba ke keyeyê ke bi kerpîç ê va û varanî ra zirar vînenê. Ganî bêrê rastkerdene û no zî mewsîmê payîzî de yeno kerdene.”

	 

	‘Weşî û nêweşîyê keyeyê kerpîçî esto’

	 

	Hemdîye tewr peyîn wina va: "Verê gama ke keyeyî biameyîne viraştene, pîya bi hawayêk kollektîf ameyîne viraştene. Dewijî kom bîne û pîya dest bi viraştişê keyeyan kerdêne. Her kes hetkarîya yewbînan kerdêne. La nika hîn rewşe vuryaya û şar êdî hetkarî ra remeno. Taybetmendîyê keyeyê kerpîç zaf ê. Hamnanî honik û zimistanî zî germ ê. La heyê nêweşî yê keyeyî zî estê. Sey mere û mar dorê keyeyî kom benê.

	 

	‘Karê ke ma kenê zehmet o’

	 

	Ayşe Bozane zî qiseykerdişê xo de wina qalê xebata xo kerd: “Ma keye de domanan rê ewnîyenê û karê keyeyî kenê. Hetêk ra zî karê wina kenê. Ma cinî hetkarîya yewbînan kenê. Herre kom kenê û bi kayî dir danê têmîyan ro. Ma ban û dorê keyeyê xo bi nê sîwax kenê. Karê ke ma kenê zehmet o.”