'Seba azadîyêk mende lazim o no tecrîd bêro wedaritene'

2020-11-02 14:09:14


	 

	Rojda Aydin

	 

	ŞIRNEX - Mayê Şirnexî, tecrîdê serê Rayberê PKKyî Abdullah Ocalanî şermezar kredî û vatî, seba azadîyêke mende lazim o tecrît bêro wedaritene. Sewbîna mayan dîyar kerd ke bi girankerdişê tecrîdî dir şer zî giran bîyo.

	 

	Rayberê PKKyî Abdullah Ocalanî 15ê Sibata 1999 ra heta nika Zîndanê Îmralîyê girewte de yo û 20ê Temmuza 2011 ra heta nika binê şertê giran yê tecrîdî de yeno tepiştene, bi keye û avûkatanê xo dir nêeşkeno pêvînayîş bikero. Sewbîna Kurdistan û Tirkîya de zî bi girankerdişê tecrîdî dir şer û pêrodayîş her ke şi kûr bi. Mayê Şirnexî, derheqê babete de reaksîyonê xo ardî ziwan û vatî ke seba azadîyêke mende lazim o no tecrîd bêro wedaritene.

	 

	Maya 44 serrî Şadîye Bîlîr, tecrîdê serê Abdullah Ocalanî şermezar kerd û va: "Tecrîdo ke serê Serekî de ameyo girankerdene, ganî bêro wedaritene. No tecrîd tesîr serê tepişteyan, cinîyan û şarî keno. Seba ke tecrîd bêro wedaritene ganî ma vengê xo berz bikerê. Eke ma bibê yew ma eşkenê tecrîd bişiknê. Serekê pêro şaran verê şar xo de yê, çira serekê ma verê ma de nîyo? Ganî Serekê ma verê şarê xo de bo. Heta key no tecrîd do dewam bikero? Ma vanê êdî bes o. Seba azadîyêke mende ganî tecrîd bêro wedaritene."

	 

	'Tecrîd ewro heme zîndanan de vila beno'

	 

	Maya 50 serrî Fatma Oget zî dîyar kerd ke Abdullah Ocalan 21 serrî yo bi tena sereyê xo hucre de yo û va: "Ganî azadîyêk mende bêra awankerdene. Seba azadîye zî ganî tecrîd bêro wedaritene. Seba berjewendîyanê xo tecrîd nêwedarnenê. Ma destûr nêdanê ke ma bixapênê. Ma do pîya tecrîdê serê Serekê xo wedarinê. Ma wazenê çîyê weş bêrê cuyayîş. Ma azadîye wazenê û azadî pawenê. Ma êdî nêwazenê qirkerdiş bêrê ciwîyayîş. Seba wedartişê tecrîdî lazim o şarê Kurdî bibo yew. Tecrîd ewro pêro zîndanan de vila beno."

	 

	'Bi girankerdişê tecrîdî dir şer zî zêde beno'

	 

	Kudret Oget zî va ke zulm û zordarî ke hemverê Kurdan yeno kerdene qebûl nêkena û va: "Ganî tecrîd bêro wedaritene. Seba bêro wedaritiş zî ganî şarê Kurdî têhet bê. Ganî no zulmê bi serran êdî peynî bibo. Bi girankerdişê tecrîdî dir şer zî zêde beno. Her roje ko û şaristanê ma yenê bombardumankerdene. Ma nêwazenê domanê ma bêrê kiştene. Wa tecrîd biqedîyo."

	 

	'Eke tecrîd bêro wedaritene do azadî bêra'

	 

	Maya 50 serrî Asya Tokay zî veng da şarî û va: "Ma nê tecrîdî şermezar kenê. Bi serran o tecrîd dewam keno. Serekê pêro şaran esto, serekê ma zî esto. Serekê ma binê tecrîdî de yo ma qebûl nêkenê. Ma hemverê pêro serekan hurmet ramojnenê, la ê hurmet nêmojnenê ra. Mayî tu wext çîyê xirab nêwazenê. Ganî merdim dayîkan ra nêterso. Waştişêk ma esto o zî azadî yo. Seba ke zerrîya ma veşena. Eke tecrîd wedirênê do azadî bêro."