Embazê Aysel Tugluke: Na rey ma do seba Aysele têkoşîn bikerê 

2022-01-15 13:19:24


	 

	ANQARA - Embazê têkoşînî yê Aysele dîyar kerd ke dewlete ganî Aysele ra ozir biwazo û vat: “ATK hemkarê cezaya dardekerdişê fîîlî yê AKPyî yo zîndanan kerdo dewre. Aysele seba mîlyonan têkoşîn da. Nika dorê mîlyonan o ke seba Aysele têkoşîn bikerê."

	 

	Yew tepişteya nêweşa ke rewşa aye giran a, sîyasetmedara kurde Aysel Tugluk serra 2016 de zîndanê Tîpê F yê Hûmara Yewin ê Kandirayî de tepişte ya. Aysele problemê giran yê weşîye ciwîyena û nêeşkena bi tena sereyê xo cuya xo dewam bikera. Nêweşxaneyê îstîmlakî derheqê rewşa Aysele de raporê ‘nêeşkena zîndan de bimano' da la Sazgehê Tipê Edlî (ATK) verpayê ci rapor da.

	 

	Parlamenterê verê yê HDPyî Tugba Hezer û Besîme Konca derheqê weşîye Aysel Tugluk de ercnayîş kerd.

	 

	‘Aysele serê ma hemine de tesîr kerda'

	 

	Tugba dîyar kerd ke Aysele tarîxê  sîyasetê Tirkîya de yewin hemsereka cinî ya û no hetê mîlyonan cinîyan de wayîrê mana yo û vat: "Aysel Tugluk zîndanê pêwa problemê cidî yê weşîye esîr yena girewtiş. Aysele seranserê têkoşînê xo de bi vindertişê xo tesîr serê heme kesî kerd.”

	 

	‘ATK beno hemkarê cezaya dardekerdişê fîîlî’

	 

	Tugba wina dewam kerd: “Îqtîdar bi tepişteyan vernîya têkoşînê kurdî bigîro. Metodêk zî no yo, wazeno  zîndanan dardekerdişî fîîlî bi ca bîyaro û nê bi ca bîyaro. Raporê ATKyî vanê, ‘eşkena tepişte bimano.' ATK goreyê nê sondê Hîpokrat, girêdayê rejîmî qerar dano. Seba nê zî ATK hemkarê cezaya dardekerdişê fîîlî yo. Rewşa tepişteyê nêweşan giran beno û  ATK bi tu hawayî nêeşkeno hesabê nê bido.”

	 

	‘Ganî ma bibê vengê Aysele’

	 

	Tugba wina qedêna: “Aysele tena semedê xo ney, seba mîlyonan cinî têkoşîn da. Seba nê zî nika tepişte ya. Dewlete qanûnê xo bi ca nêana.  Aysele û tepişteyê sîyasî seba ma têkoşîn dayî, ewro bedel danê. La ma zî deyndarê înan ê ke seba înan têkoşîn bikerê. Aysele seba mîlyonan têkoşîn da û ganî mîlyon zî bêrê têhet û seba nê têkoşîn bikerê."

	 

	‘Seba serdestîyê mêrdan birijnê  têkoşîn da’

	 

	Besîme Konca zî dîyar kerd ke  Aysele sey cinîyêke, sey huqûqnas û sey cinîyêke Dêrsimî prosesê têkoşînî de tesîrêk pîl serê embazê xo kerda û vat: “Aysele tarîxê sîyasetê Tirkîya de yewin hemsereka cinî ya. Seba sîstemê serdest yê camêrdan birijno têkoşîn da. Demê hemserekî de vîrardişê ci yê merdiman kêfweş keno esto. Aysele xeylê zilma dewlete ra nisêbê xo girewt. Birayê Aysele 1980 de zîndan de netîceyê îşkenceyî de dinyaya xo bedilna û bi dayika xo dir koçê metropolî kerd. Pêwa nê game peyser nêant. Têkoşînê xo kerd. Siyaset de ca girewt. Bedel da. Buroyê huqûqî ya Asrinî de ca girewt. Pawitişê heqî kerd. Avûkatîya Birêz Ocalanî kerd. Aysele nika tepişte ya, problemê weşîye ciwîyena. Nîna veradayîş. La ma sondê hîpokrat bi ATKyî danê ard vîr. Qerarê ATKyî AKPyî ra xoser nîyo."

	 

	‘Ganî dewlete ozrê xo biwazo'

	 

	Besîme tewr peyîn wina vat: "Aysele xeylêk rey hedef ameye girewtiş. La esîrgirewtişê aye rewşa ci tewr giran keno. Bi hezaran tepişteyî binê rîskî de yê. Zîndan de mergî zêde bîyê. Bêguman kampanyaya seba înan yenê kerdiş, girîng ê. Ganî heme sazgehê huqûqî têbigeyrê. Ganî  têkoşînêk sebebê huqûqî deşîfre keno bêro kerdiş. Çîyê cenazeya dayîka Aysele ameyî kerdiş sûcê merdimayî yo. Coka dewlete deyndarê Aysele ke ozur biwazo."