'Tena kurdî û HDP ameyî hetkarîya ma’

2023-03-11 11:10:40


	 

	 

	Dîlan Babat

	 

	HATAY - Hemwelatîyê ke Raşteyê Bazarê Taxe ya taxa Ataturkî ya Samandagî de manenê dîyar kerdî ke her çend ke yew aşme erdlerzî sero ra derbaz bibo zî vêşêrê HDP û kurdan tu kesêk hetkarîya înan nêkerdo û vatî: “Dewlete tu paştîdayîş nêda. HDP ame hetkarîya ma.”

	 

	Samandagî ya Hatayî ke erdlerzî vera tede texrîbatêk gird virazîyabî de şar bi paştîdayîşê zerrîwazan birînanê xo pişneno. Hemwelatîyê ke hema zî tersê girdî cuyenê, meraq kenê ke pereyo ke bernameyê TVyî de ame arêdayîş şi kam ca. Hemwelatîyê ke Raşteyê Bazarê Taxe ya taxa Ataturkî ya Samandagî de manenê bi îmkananê xo brandayanê ke kom kerdî ra kon viraştî û dîyar kerdî ke vêşêrê HDP û kurdan tu kesêk hetkarîya înan nêkerdo.

	 

	‘Nêameyî xelisnayîş’

	 

	Nezîye Gumuşe dîyar kerd ke heme hemwelatîyê taxe bazarê taxe de bi ca bîyî û zerrîwazî înan rê kon ardî la hema zî hetê konan de probleman cuyenê. Nezîyeye wina dewam kerd: “Yew aşmî yo ke ma xo nêşito. Ma bi îmkananê xo kone dî la hema zî yê ke bêkone cuyenî estê. Kelepulê hîjyenî çin ê. Hirê roje ekîbê xelisnayîşî nêameyî tîya. Merdimê ma 6 roje ra tepîya ameyî vetiş. Eke ekîb lez biameyêne hende merdimî do nêmerdêne. La xeylê keyeyî dinyaya xo bedilnayî.”

	 

	Hetkarî kurdan û HDPyî ra ame

	 

	Nezîyeye peynîya qiseykerdişê xo de vat: “Wexto ke erdlerz qewimîya hewa zaf serdin bî. Ma şîyî bazarê taxe. Ma uca ra vejîyayî. Cayê ma çinî bî. Çar rojan ca çinî bî ke ma rakewê. Ma serê paketê bazarcîyan de rakewtêne. Ma bi îmkananê xo nê cayî viraşt. Hetkarî kurdan û HDPyî ra ame. Ma bi îmkananê xo kone rona.” 

	 

	‘Dewlete erê mende’

	 

	Cinîya bi nameyê Yildiz Gumuşe zî nê çîyan ard ziwan: “Merdimê ma Harbîye ra konî ardî. Kurdan zî kone ard. Ma tena nêverdayî. La dewlete tu çîyêk nêkerd. HDP merdimîye mojna ma. Hema lez ame hetkarîya ma. La dewlete zaf erê mende. Dest rona serê hetkarîya HDPyî. 

	 

	‘Gelo ganî ma koç bikerê?’

	 

	Yurdanur Yilmaze zî da zanayîş ke rewşa înan ya ekonomî baş bî û vat: “Ma nêzanê ke do key ma bêrê xo ser. Yew aşme derbaz bî, bi hawayêk cidî televîzyonan de bexş ameyî arêdayîş. Acaba no pere şî kam ca. Vernîya ma tarî ya. Ma nêzanê ke do se bibo. Sozê ke dewlete da nêzana do senî bibê. Ma fikirîyenê. Acaba do her kes bibo wayîrê banêk.”