Azadîya cinî bi ‘Jin Jiyan Azadî’ vejîyena werte

2024-10-08 09:54:11


	 

	 

	 

	Neslîhan Kardaş

	 

	WAN - Endama Meclîsê Cinîyanê DBPyî Ayşe Çelîkbîlek da zanayîş ke komployê 9ê teşrîna verêne ya hemverê Rayberê PKKyî Abdullah Ocalanî ke mîmarê felsefeya ‘jin jiyan azadî’ yo, ser nêkewto û vat: “Dimayê têkoşînê ey sere de cinîyê kurdî pêro cinîyê dinya têkoşîn kerdî. Komplo nêresa armancê xo. Komplo, vînîkerdişê îqtîdarî mojna. Birêz Ocalan zî bi azadîya fikr û fehmê xo azadîya cinî fîna vernî.”

	 

	Hêzê mîyanneteweyî yewine gama komployî ê hemverê Rayberê PKKyî Abdullah Ocalanî 9ê teşrîna verêne ê 1998ine de eşt. Abdullah Ocalan Sûrîye ra mecbûr mend ke vejîyo û 4 aşmî dima 15ê Sibata 1999ine de teslîmê Tirkîya ame kerdiş. A roje ra nata zîndanê Îmrali de yeno tepiştiş.

	 

	Rayberê PKKyî Abdullah Ocalan ke mîmarê felsefeya ‘Jin jiyan azadî’ yo, bi paragdîmayê ke da werte, sloganê ‘jin jiyan azadî’ pêro dinya de ziwanê cinîyan ser o. Dimayê qetilkerdişê Jîna Emînî slogan vila bî û Hîndîstan de zî dimayê qetilkerdişê cinîyêke cinî vejîyayî kuçeyan û slogan berz kerdî.

	Endama Meclîsê Cinîyan ê Partîya Demokratîke ya Herêman (DBP) Ayşe Çelîkbîlek derheqê komployî de qisey kerd.

	 

	‘Tecrîd tenê fîzîkî yo’

	 

	Ayşe bale ant serê tecrîdo ke 26 serrî Rayberê PKKyî Abdullah Ocalanî ser o dewam keno û vat: “Birêz Ocalan binê tecrîdî de felsefeya ‘jîneolojî’, ‘jin jiyan azadî’, sîstemê hemserekî awan kerd. No zî mojneno ke tesîr serê fikrê Abdullah Ocalanî de nêbeno. Tenê tecrîdêk fîzîkî est o. Bi çar serrî yo tecrîdêk giran est o. Ma rewşa serekî nêzanê. Pêwa nê zî seba cinîyan, tutan, komelî çîyê neweyî awan kerdê est ê gelo? Derheqê qetilkerdişê cinî, tutan û xoza de ercnayîşê neweyî est ê gelo, ma nînan nêzanê. Semedê nê zî çîyo ke ma bikerê oyo ke terzê fikr û fehmê Birêz Ocalan ke dayo vernîya şaran, ma verê çiman de bigîrê.”

	 

	‘Komployî vînîkerdişê îqtîdarî her kesî rê mojna ra’

	 

	Ayşe tewr peynî wina vat: “Zîhnîyetê serdest ê camêrdan hemverê felsefeya ‘jin jiyan azadî’ yo. Coka nêwazenê Birêz Ocalan na felsefe aver bero. La no komployo ke yeno kerdiş, vernîya fikrê Abdullah Ocalanî nêgirewt. Heta pîlêr kerd. Ma zaê ke cinî azad nêbê, komel zî azad nêbeno. Coka azadîya cinîyan, tutan, komel û xoza, girêdayeyê tecrîdê hemverê Abdullah Ocalanî yo. La key tecrîd peynî bibo do komel zî azad bibo. Komplo mojna ke îqtîdar vînî kerdo.”