Efrîn 6 serrî yo bi îşxalkerdiş, desteştiş û talanî yeno zanayîş 

2024-10-11 10:44:48


	 

	 

	Derya Ren

	 

	RIHA - Goreyê raporê Rêxistina Heqê Merdiman ê Efrîn-Sûrîye, aşma gulane de ameyo amadekerdiş,  2018ine bi îşxalkerdişê Efrînî yê hetê Tirkîya ra heta nika 463 kesî ameyê qeitilkerdiş, 10 hezar û 332 kesî ameyê remnayîş, 142 kesî desteştiş ameyo kerdiş. Îdarekara Rêxistina Heqê Merdiman ê Efrîn-Sûrîye Zeynep Suleyman da zanayîş ke NY hemverê hêrişan de berpirsyarîyê xo nêano ca.

	 

	Serê îşxalkerdişê Efrînî ke Tirkîya de 20ê Adara 2018ine de destpêkerdî de 6 serrî û nîm derbaz bî. Goreyê raporê Heqê Merdiman ê Efrîn-Sûrîye yê aşma Gulane de ame amadekerdiş 2018ine bi îşxalkerdişê Efrînî yê hetê Tirkîya ra heta nika 463 kesî ameyî qetilkerdiş, 10 hezar û 332 kesî ameyî remayîş, 142 kesî rê desteştiş ame kerdiş.

	 

	Îdarekara Rêxistina Heqê Merdiman ê Efrîn-Sûrîye Zeynep Suleyman JINNEWSî rê ercnayîş kerd.

	 

	‘Keyeyî yenê îşxalkerdiş’

	 

	Zeynepe vat, Tirkîya 2018ine de hemverê Efrînî de dest bi hêrişan kerda û vat: “A roje ra Efrîn binê îşxalkerdişî de yo. Qetilkerdiş, remnayîş, talan, dizdî est o. Xoza ameya serûbinkerdiş. Se ra 95 hûmara kurdan est bî, nika se ra 80 erebî ciwîyenê. Efrînijan bi zor keyeyê înan ra vejenê. Şiyê mabeta û Raco de 5 hezar darê zeytûnan û darê fêkîyan ameyî veşnayîş. Seba her keye 10 dolar, seba her dikanî 200 dolar, seba kolnayîşê bîrî 500 dolar yeno waştiş.”

	 

	‘Hêrişî sûcê merdimayî yê’

	 

	Zeynepe wina dewam kerd: “Zeytûnî çimeyê debara şarî yê. Bi nê caardişî vernîya debara şarî yena girewtiş. Ma zî nê bêhuqûqîyan kenê rapor û şirawenê NYyî. La çi heyf seba raporê ma hema cewab nêameyo dayîş. Çi heyf şarê Efrînî nêpawitî. NY ganî rolê xo kay bikero. Zor û zehmetîyê ke cinî ciwîyenê, tewr giran bîyo. Cinî yenê qetilkerdiş, yenê remnayîş, desteştiş yeno kerdiş. 2018ine ra heta nika 200 cinî ameyî tepiştiş û yê ke desteştiş ameyo kerdiş est ê. 14 cinîyan întîxar kerd. Ma 6 aşman ra reyke raporê xo amade kenê û şirawenê NY.”

	 

	‘Berpirsyarîyê NYyî çî yo?’

	 

	Zeynepe tewr peyîn wina vat: “Hemverê kesê ke wazenê Efrîn ra vejîyê, rastê hêrişî yenê û xesp yeno kerdiş. Berpirsyarîya NYî çî yo? Çira îşxalkerdişê Efrînî nêvînenê. Na bêvengîyêke senîn a? NY berpirsîyar o. Şarê uca mîyanê tersêk pîlî de yo. Ma nêeşkenê xo biresnê pêrûne. Pêwa bêîmkanan ma hewl danê vengê xo bidê eşnawitiş. Ganî NY rolê xo kay bikero.”