Semedê rayîrşîyayîşê 25ê Teşrîna Peyêne vengdayîş 

2024-11-23 11:00:28


	 

	 

	WAN - Cinîyan semedê rayîrşîyayîşo ke do 25ê Teşrîna Peyêne de Wan de bêro organîzekerdiş veng dayî û vatî: “Bêrê ma pîya vengê xo berz bikerê. Ma pîya vajê, ‘Jin Jiyan Azadî’ û pîya polîtîkayan birijnê.”

	 

	Wan de çarçewaya 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî de bername û çalakîyê tewir bi tewir pê yenê. Taxan de kombîyayîşî benê û cinîyan dir paştdayîş yenê mojnayîş. Bi serkêşîya Têgêrayîşê Cinîyanê Azadan (TJA) roja 25ê Teşrîna Peyêne saete 13.00ine de verê merkezê Aydin Perîhan (AVM) de do rayîrşîyayîş bibo.

	 

	Cinîyê TJAyî derheqê rayîrşîyayîşî de vengdayîş kerdî.

	 

	‘Çi destê ma ra bêro ma do bikerê’

	 

	Yildiz Çetîn ya TJAyî bale ant qetilkerdişê Narîn Guran û Rojîn Kabaîşe ser o û vat: “Ma şikdaran dir ciwîyenê. Zîhnîyeto serdest, wareyê cinîyan roj bi roje teng keno. Semedo ke qetilkerdişê cinîyan peynî bibo, çi destê ma ra bêro ma do bikerê. Amancê ma oyo ke qetilkerdişê cinîyan peynî bibo. Yê ke nê têkoşînî kenê, bedelê giranî dayî. Polîtîkayê ke yenê caardiş, do gamanê ma peyser nêdê eştiş. Ma do 25ê Teşrîna Peyêne de bêrê têhet û vajê, ‘Jin Jiyan Azadî’. Ma do pîya têbigêrê û polîtîkayan pîya birijnê.”

	 

	‘Sebebê zêdebîyayîşê qetilkerdişan hukmat o’

	 

	Edîbe Babur zî wina qal kerd: “Ma venga hukmatî kenê. Sebebê her çîyê ke yenê ciwîyayîş hukmat o. Yanî camêrd kişenê, desteştiş keno la çi heyf ceza nêgîno. Şîdet yeno kerdiş. Ma no hukmato ke huqûq nas nêkeno, şermerzar kenê. Ma venga hukmatî kenê ke wezîfeyê xo ca bîyaro. Ma do 25ê Teşrîna Peyêne de saete 13.00ine de meydanan de bê.”

	 

	Ma do 25ê Teşrîna Peyêne meydanan de bê

	 

	Sosin Oktay zî wina vat: “Ma nêwazenê bêrê qetilkerdiş, şîdet bivînê. Ma cinî ganî vengê xo berz bikerê. Bi nê sebebî 25ê Teşrîna Peyêne de rayîrşîyayîşê ma est o. Ma pêro cinîyan pawenê.”

	 

	Halîme Albay zî venga rayîrşîyayîşî kerd û wina vat: "Ma cinî pêro meydanan de bê. Ma hemverê şîdetî de vengê xo berz bikerê.”

	 

	Dîlan Çelîk zî venga rayîrşîyayîşo ke do 25ê Teşrîna Peyêne de verê Perîhan Aydin AVMyî de dest pêkeno kerd û vat, ganî pêro cinî a roje meydanan de bê û vengê xo pîya berz bikerê.