Verfeka TJK-Eyî: Do wext cidîyetê Tirkîya bimojno ra 

2025-01-17 11:28:02


	 

	Melek Avci

	 

	ANQARA - Verfeka TJK-Eyî Ayten Kaplan polîtîkaya qirkerdişî ya Tirkîya û munaqeşeyê rojane ercna û vat: “Hetêk ra qirkerdiş yeno ferzkerdiş heto bîn ra zî dîyalog û aştî yeno ferzkerdiş. Çiqas cidî yê do wext bimojno ra.”

	 

	Kampanya ‘Abdullah Ocalanî rê azadî meselaya kurdî rê çareserî’ ke 10ê teşrîna peyêne 2023ine de hetê kurd û dostanê kurdan ra ame destpêkerdiş, dewam kena. Şirawitişê mektuban, rojê wendişî, mîtîng û panel berê Îmraliyî akerdî. La semedê gamê hîn somutî bêrê eştiş, xoverdayîş dewam keno.

	 

	Verfeka TJK-Eyî Ayten Kaplan derheqê hemle û munaqeşeyê neweyî de ercnayîş kerd.

	 

	‘Qirkerdiş û komplo girêdayeyê yewbînan ê’

	 

	

	Ayten Kaplan bale ant serê rayîrşîyayîşê hîrê cinîyê kurdî yê ke Parîs de amebî qetilkerdiş û wina vat: “Semedo ke proses zelal bibo, ma hewl danê. Ma 11ê Çeleyî de rayîrşîyayîşêk Parîs de kerd. Ma pey edaletî de yê. Ma waşt ke bîyarê vîr. No muhîm o. Tewrbîyayîş zaf baş bî. Kanada, Avusturya, îngîltere û Kibris de çalakî pê ameyî. Qirkerdiş de berpirsyarîyê îstîxbaratê tirkî est o. Ma vat, ganî nê wina bêro destgirewtiş. Qirkerdiş û komplo girêdayeyê yewbînan ê.”

	 

	‘Hetêk ra qirkerdiş, hetêk ra dîyalog’

	 

	Ayten Kaplan wina dewam kerd: “Rewşa bîyaye de ewro hetêk ra qirkerdiş yeno ferzkerdiş, heto bîn ra zî aştî û dîyalog yeno ferzkerdiş. Do wext bimojno ra ke çiqas cidî yê. Prosesê verî yê diyalogî de hîrê hevalê ma ameyî qetilkerdiş. Ganî wina bêro ewnîyayîş. Hevalê ma serkêşê têgêrayîşê cinîyanê kurdan bî. Dewleta tirkan badê Sakîne înan xeylêk qetilkerdişê cinîyan ke bi amancê vernîya têkoşînê cinîyan padê pê ard. Nimûne wareyê cîya de hevalanê ma bi SÎHAyî qetil kerdî.”

	 

	‘Qonaxo diyîn azadî yo’

	 

	Ayten Kaplan dewam de wina vat: “Tewr peyîn Konseya Ewropayî qerarê xo de serrêke da Tirkîya; heta êlula 2025ine vurnayîşê şertê tecrîdî bî û heqê hêvîye ra feyde girewtiş bî. Na nokta de netîceya tedayan game ameye eştiş. Wexto ke kewtî tengasî gamêke winasî eştî. Vernê de keyeyî pêvînayîş kerd û badê zî DEM Partî kerd. Ma Tirkîya ra ewnîyenê eşkerayî cîya yê. Terz dîyar o, bendewarî dîyar a. Serokatî newe ra ano rojeve. Semedê azadîya serekî do xebatê ma dewam bikerê. Qonaxê diyîn ê hemleyî azadîya serekî bibo.”

	 

	‘Vernîya ma de planêk pirrî est o’

	 

	Ayten Kaplan dîyar kerd hetêk ra qalê aştî kenê û hetêk ra zî hêrişê Rojawanî kenê û wina vat: “Nê nakokî yê. Dewlete ganî na babete de çareserî biwazo û ganî hêzê xo Başûrî ra bianco. Vakur de  fek polîtîkaya qeyûman ra vera bido. Ma do proses rayîr ra berê û paştdayîş bidê. Vernîya ma de planê xebatêke pirrî est o. 25ê Çele serrgêra xelasîya Kobanê ya. Vernîya ma de 15ê Sibate est o. 8ê Adare est o. Ma do xebatanê xo bi çalakî û bernameyan dewam bikerê.”