Cinî hemverê ziwanê şîdetî yê dewlete de bireaksîyon ê 2025-03-07 11:20:41   Melîke Aydin   ÎZMÎR - Cinîyan vengdayîşê seserre bi kelecan pêşwazî kerdî û dîyar kerdî ke ganî komel wayîrê aştîya bi rûmet vejîyê û vatî ganî dewlete fek ziwanê bêtêduştî ra vera bido, tepişteyê sîyasî zî ganî bêrê veradayîş.   Heyetê Îmraliyî yê Partîya Têduştî û Demokrasî (DEM Partî) 27ê Sibate de Rayberê Şarê Kurdî Abdullah Ocalanî dir pêvînayîş kerd û badê nê vengdayîşê seserre ame neqlkerdiş. Vengdayîş hetê cinîyan ra bi kelecan ame pêşwazîkerdiş û ame dîyarkerdiş ke ganî dewlete fek ziwanê bêtêduştî ra vera bido û vatişê aştîye de samîmî bo.   ‘Sîstem dişminê pêro kesan o’   Hemsereka DEM Partîye ya Selçukî Şevîn Aydemîr da zanayîş ke heqê tewr xozayî yê şarê kurdî yenê xespkerdiş û vat: “Îqtîdar nê heqan nêkeno babeta vatişî. Bi veradayîşê çekan her çî peynî nêbeno. Eke heq nêro dayîş, aştî nêbena. Tirkîya bi sîstemêk faşîst welat îdare kena. Wazena pêro kesî esîr bigîra. Kesê ke hetê înan nîyê, dişmin îlan kena. Her kesî terorîze kena.”   ‘Şer goreyê hesabê dewlete yo’   Karkera keyeyî Gulten Altindag zî da zanayîş ke bi serran o kurdî çin yenê hesibnayîş û vat: “Şer goreyê hesabê dewlete yo. Wa dayîkî mebermê û kes nêmiro. Wa leşkerî, kurdî, tirkî nêmirê. Wa her di hetan ra zî kesî nêmirê. Ma semedê pêvînayîşê heyetê DEM Partîye ya bi Herêma Federal a Kurdistanî û Îdareya Xoserî ya Sûrîye dir zaf keyfweş bî. Ganî kurdî bêrê têhet. Ganî bibê yew.”   ‘Ganî masaya verê xira nêbîne’   Kedkara keyeyî Yeşîm Tuna Kiziltoprak zî da zanayîş ke a sey dayîkêke tirke wazena aştîyêke mende bibo û vat: “Wexto ke dayîkê aştîye û dayîkê tirkî yewbînan ko bikerê, do aştî pê bêro. Hêzê dayîkan do na gonî bido vindarnayîş. Ganî masaya verî ya  aştîye xira nêbîne. Eke xira nêbîne do Rojhelata Mîyanên de wisar bibayîne. Ganî îqtîdar, serekkomar fek ziwanê bêtêduştî ra vera bido. Hem vanê aştî hem zî qeyûman tayîn kenê. Ganî îqtîdar samîmî bo.”   ‘Ganî kurdî têhet de bê’   Menîce Demîrhan zî dîyar kerd ke eke aştî bêro waştiş ganî qeyûmî nêrê tayînkerdiş û ganî tepişteyê sîyasî bêrê veradayîş. Menîce Demîrhan wina vat: “Rojêke vanê aştî, roja bîn kurdan erzenê zîndan. Ma kurd ê, terorîst nîyo. Ma zî wayîrê her çî yû. Ganî semedê aştîye Erdogan qisey bikero. Ganî kurdî bibê yew û têhet de ca bigîrê.”