‘Rojîne întîxar nêkerd, ameye qetilkerdiş’ 

2025-03-07 12:00:44


	 

	Gulistan Gulmuş

	 

	AMED - Mergê bi şik ê Rojîn Kabaîşe hema nêameyo roşnkerdiş. Keyeyê Rojîn Kabaîşe da zanayîş ke kênaya înan întîxar nêkerda, qetil kerdî. Eynî wextî de waştî ke cinî 8ê Adare de nameyê Rojîn Kabaîşe biqîrê.

	 

	Bi rojan o amadekarîyê 8ê Adare Roja Cinîyan ê Dinya yenê kerdiş. Her sazgeh do xeylêk bajar, taxe û dewan de bernameyan pê bîyarê. Ver bi 8ê Adare ma şî wendekara unîversîteya Yuzuncu Yilî Rojîn Kabaîş ke vînî bî û 18 rojî dima cenazeya aye ameye vînayîş. Mergê Rojîn Kabaîşe sey Narîn Guran ame rojeve la çi heyf hema mergê aye bişik nêameyo roşnkerdiş.

	 

	Keyeyê Rojîn Kabaîşe bi hewtan o cigêrayîşê edaletî de yê. Keye dîyar keno ke kênaya înan întîxar nêkerda û ameya qetilkerdiş. Semedê rastî bimûsê zî têkoşînê xo dewam kenê.

	 

	’18 rojî ma dorê a awe de bî’

	 

	Dayîke Aygul Kabaîş wina qal kerd: “Semedê unîversîte şî Wan. Hîrê rojî dima ez aye geyraya. Mi rê fotografê werdî şirawit û badê bi dîmen geyra. Ma qisey kerd. Vat tîya zaf zor o la do mşyanê demî de bimuso. Badê mi vat, ti şina ça? Va, ez şina neskafe gêna. Va, ez agêrî ez o to bigeyrî. Badê nêgeyra. Mi zî vat, hevalê aye oda de est ê, ez înan rehet verdî. Badê mi mesajêk bi veng şirawit. Mesajê mi nêvîne. Mesajê mi nêvîna. Mi mereq kerd. Nîm saete badê ez geyraya. Ancî anêkerd. Mi vat, rakewena. Roja bîn serê sibayî saete 10ine de şîya market. Ez agêraya polîsî mi geyrayî. Vatî, Rojîne nêameya wargeh. Mi vat, şima çira şan de  agahî nêda. Mêrdeyê mi Êlih de bî. Tutê mi zî Yalova de şuxilênê. Senîn şinawitî şîyî Wan. Ez zî tîya ra şîya. 18 rojî ma dorê a awe de bî. Ma bi awe xepênayî. Vatî awe de fetisîyaya. 13 rojî ez uca de menda û badê agêraya. Mi waşt tena bimanî. 18 rojî dima agahîya aye ameye.”

	 

	‘Wa bibê vengê Rojîne’

	 

	Aygul Kabaîş vatişê xo wina dewam kerd: “Rojîne întîxar nêkerd. Aye eştî awe. Senî kerdî ma nêzanê. Kênaya mi întîxar nêkerd. Kênaya mi hîrê serrî semedê unîversîte xo amade kerd. Keyfweş bî. Çira merdimêke wina întihar bikera. Wa 8ê Adare de pêro kesî nameyê Rojîne biqîrê û bibê vengê aye.”

	 

	'Ma do heta peynî taqîbkerdoxê dewa bê'

	 

	Ozlem Kaganarslan zî wina qedêna: “Ma do heta peynî taqîbkerdoxê dewa bê. Ma keyfweş nêşinê 8ê Adare. Ez 8ê Adare pîroz nêkena. Ne Rojîne, ne Narîne û ne zî Sila bebeke nê 8ê Adare de çin ê. Wa tu kes wareyan de bi coş û pîrozkerdişî xo nêxapêno. Hende cinî yenê qetilkerdiş û ez fam nêkena çira 5 aşmî yo ke dewaya Rojîne netîce nêbena. Xeylêk çî werte de yê. Cînayet werte de yo. Kes nêzano zî keye tutê xo baş nas keno. Rojîne unîversîte qezenc kerd. Rojîne kesêk ke întîxar bike nêbî. Keda xo ya di serran eşkena di rojan de peynî bikera.”