Zîndanan de caardişê keyfî dewre de yê 2025-04-12 10:26:57   Pelşîn Çetînkaya   AMED - Avûkate Esra Saçaklidir derheqê binpaykerdişê heqan yê zîndanan de qisey kerd û da zanayîş ke tepişteyê ke bi binpaykerdişê fîzîkî û psîkolojîk dir yenê rî bi rî, bi caardişê keyfî heqê cuye yê sereyîn yenê astengkerdiş.   Zîndanê Tirkîya de binpaykerdişê heqan dewam kenê û problemî her ke şinê zêde benê. Binpaykerdişê heqan yê bi OHALî yê 2016ine zêde bî, keye û tepişteyan mexdur kenê.   Avûkate Esra Saçaklidir derheqê binpaykerdişî hemverê demokratîkî yê zîndanan de qisey kerd.   Esra Saçaklidir da zanayîş ke sebebê binpaykerdişan kêmîyê mekanîzmayê hukmî û polîtîkayê bêcezaverdayîşî yê û wina va: "Mekanîzmayê kontrolî yê hukmî benê sebebê caardişê keyfî. Netîceya nê sebeban de pêvînayîşê avûkatan yenê sînorkerdiş, têkilîyê keyeyî dir yenê astengkerdiş. Semedê nê zî problemî dewam kenê. Tepişteyê ke tahliyeyê înan ameyî, bi qerar ê heyetan ra yenê astengkerdiş.”   Metodê cezakerdişî yê şikinayîşê rumetî   Esra Saçaklidir dîyar kerd ke zîndanan de bi taybetî cigêrayîşê zitî yeno kerdiş û no zî hemverê rûmetî yo û va: “No metod hemverê rumetî yo. Rewşa tepişteyê cinîyan hîna giran o. Nê caardişê zîndanan, hemverê rumetê merdiman o. Cigêrayîşê bi israr yenê kerdiş, bi amancê cezakerdişî yê.”   ‘Amanc îzolekerdiş o’   Esra Saçaklidir dewam de wina va: “Amancê zîndanan teberê bajaran de şertê nêbaş de ameyê awankerdiş, îzolekerdişê tepişteyan o. Amancê înan o yo ke tepişteyan binê kontrolî de verdê. Nê zîndanê neweyî benê sebebê problemê fîzîkî û psîkolojîkî. Rewşe her ke şina zehmet bena. Heqê tewr sereyîn yê tepişteyan ra yenê astengkerdiş. Tepişteyî nêeşkenê xo biresnê heqê weşîye, perwerde û komelî. Pêvînayîşî avûkat û keyeyan dir yenê atengkerdiş.”   ‘Ganî mekanîzmayê xoser bêrê awankerdiş’   Esra Saçaklidir tewr peyîn wina va: “Zîndanan de problemê kontrolî est o. Ganî mekanîzmayêk xoser şêro zîndanan de kontrol bikero û tespîtan rayapêroyî dir pare bikero. Ganî heqê pêvînayîşê avûkatan yê tepişteyan dir nêrê astengkerdiş. Semedê xebatkarê zîndanan ganî perwerde bêro dayîş. Ganî xêrcê nê STKyî bi tepişteyan dir bi rêk û pêk pêvînayîş bikerê, raporan amade bikerê û rayapêroyî dir pare bikerê.”