‘Vengdayîşê aştî do cuya her kesî asan bikero’ 

2025-04-12 10:59:29


	 

	Elfazî Toral

	 

	STENBOL - Cinîyan dîyar kerd ke ganî proses pozîtîf netîce bo û vatî: “Ma paştî danê waştişê têduştî û demokrasî yê şarê kurdî. Caardişê waştişê şarê kurdî do cuya komelî asan bikero. Demokrasî û aştî do vernîya pêro kesan abikero.”

	 

	Rayberê Şarê Kurdî Abdullah Ocalanî 27ê Sibate de bi hemkarîya heyetê Îmraliyî vengdayîşê "Aştî û Komelê demokratîkî" kerd. Badê vengdayîşê bi serkêşîya meclîsê cinîyan ê DEM Partî hem Kurdistan hem Tirkîya "pêvînayîşê cinîyan yê awankerdişê aştî û komelê demokratîkî" pê ameyî. Sere de cinîyan pêro hetan ra waştî ke dewlete lezkî gamê somutan bierzo.

	 

	Cinîyan derheqê "Aştî û komelê demokrtîkî" de qisey kerdî û dîyar kerdî ke vengdayîşê aştî tena semedê kurdan nê, semedê pêro şaran muhîm o.

	 

	Temsîlkara Platformê Ma do Kiştişê Cinîyan Vindarnê (KCDP) Esîn Îzel Uysal dîyar kerd ke Tirkîya de bi serran o hemverê kurdan de bêtêduştî est o û va: “Eke ewro ma qalê komelêk demokratîkî bikerê, ganî her kes eynî heqan ra feyde bigîrê têduşt bê. Nika tenê kurdî nê pêro şarî azad nîyê. Nika ma tesîrê nê bi eşkera vînenê. Demêk derg o qeyûman tayînê şaredarîyê şarê kurdî kenê. Ewro tayînê şardarîya Stenbolî zî kerdî. Ma prosesêk wina ra derbaz benê. Nê semedî ra gama aştî û demokratîkbîyayîşê do vernîya her kesî abikero. Wezîfe keweno milê pêro kesî ser o.”

	 

	‘Ma do bi tecrubeyê xo komelê demokratîkî awan bikerê’

	 

	Esîn Îzel Uysal dewam de wina va: “Cinî bi seserran o semedê heqê cuye têkoşîn kenê. Camêrdî bi cesaretêk pîl cinîyan kişenê. Çîyê ke yenê ciwîyayîş girêdayeyê problemê demokrasî yê. Na babete de tecrubeyêk ma yê pîlî est o. Têgêrayîşê cinîyan ê kurdan û tirkan bi serran o pîya yê. Lazimî est a ke ma bêrê têhet. Xeylêk muhîmo ke meclîsê cinîyan ê DEM Partî bi rêxistin û platformê cinîyan dir têkiliyan ronê. Ganî ma bibê parçeyêk têkoşînî. Ez venga pêro cinîyan kena ke bibê parçeyêk têkoşînî û bêveng nêmanê.”

	 

	‘Vengdayîşê aştîye do cuya her kesî asan bikero’

	 

	Femînîst Fîrdevs Hoşer dîyar kerd ke welat de 40 serrî emrê xo bi waştişê aştîye derbaz kerdo û wina va: “Ez hetê waştişê têduştî, demokratîk û aştîye yê şarê kurdî ya. Ganî waştişê şarê kurdî ca bêrê. Caardişê nê waştişan, do cuya ma zî asan bikero. Semedo ke no proses aştîyane bibo û mende bibo, pêvînayîşê cinîyan dir muhîm ê. Hêvîdar a no proses ameyo destpêkerdiş na rey netîce bibo.”