Qirkerdişê elewîyan: Cinî bazar de yenê rotiş 

2025-04-29 10:36:34


	 

	Derya Ren

	 

	RIHA - Endama Têkilîyê Teberî yê Kongra Star Ronahî Hesen dîyar kerd ke cinîyê elewî bajarê qeraxê Sûrîye ra yenê remnayîş, venga rêxistinê heqê merdiman yê mîyanneteweyî kerd û va, "Ewro cinîyê elewî bazaran de yenê rotiş.”

	 

	Rejîmê Baasî yê 61 serrî badê hêrişê rastî û nêrasterast yê HTŞ’yî û hêzê hegemonîkî yê ke waştêne herême ra para xo bigîrê, rijîya. Wexto ke nêzelalîyêk Rojhelatê Mîyanên, bi taybetî Sûrîye, badê rijnayîşê rejîmê Baasî serdest bî, HTŞ'yî Şam de hukmatêk demkî neql kerd.

	 

	Bajarê qeraxî yê Sûrîye bi taybetî Laziqiye, Hama, Hums û Tertûsî de qetlîamê hemverê elewîyan dewam kenê. Goreyê raporê Keyeyê Çimdarîyê Heqê Merdiman ê Sûrîye (SOHR) ke 15ê nîsane de ame weşanayîş, qirkerdişan de sere de cinî û tutî tewr zêde bîyê hedef û aşma peyîn de 17 cinî û tutî ameyê remnayîş û 5 elewî zî ameyî qetilkerdiş.

	 

	Endama Têkilîyê Teberî yê Kongreya Star Ronahî Hesen ke bajarê qeraxî de babeto ser o cigêrayîş kena, ercnayîş kerd.

	 

	Ronahî Hesen dîyar kerd ke rijnayîşê rejîmê Baasî re Sûrîye de hêvîyêk virazîya û wina va: "Nê hêvî mîyanê şarê elewî de zî vejîya werte. Semedo ke cimeatê elewî semedê rejîmê Baasî rastê xeylêk probleman ameyîne. Badê rijnayîşê rejîmî hêrişî elewîyan ser o ameyî kerdiş. Labelê 7ê adare de hêrişêk pîl elewîyan ser o pê ame. Çarçewaya nê hêrişan de hîn herêman de xeylêk cinî ameyî remnayîş û qetilkerdiş.”

	 

	‘Cinîyê elewî bazar de yenê rotiş’

	 

	Ronahî Hesen ard vîr ke çeteyê DAIŞ'î serra 2014ine de cinîyê êzidî bazaran de rotî û va, "Ewro cinîyê elewî bazaran de yenê rotiş, keyeyê înan yenê  talankerdiş. Hêrişan de ma vîna ke wazenê temamê komelî de elewîyan çin bikerê. Xeylêk cinîyan ra agahî nîna girewtiş, ma nêzanê nê cinîyanê ke remnenê benê ça. Hîn vîdeoyê ke endamê HTŞ'yî  kanalê medyaya dîjîtale ser o pare kerdî de, yeno vatiş ke operasyonê bajarê qeraxî de cinîyan zî xo dir berdê."

	 

	Hemverê qirkerdişî de bêvengî est a

	 

	Ronahî Hesen dewam de wina va: "Hukmato nika bingehê yew neteweyî ser o yo labelê Sûrîye de yew şar zî nêmendo. Xêrcê ereban, kurdî, durzî, elewî, xirîstîyanî, tirkmenî û ûsn. est ê. Bawerîya kesî hukmatê Şamî ra nîna. Îdareyê durzî û elewî bi taybetî zî bawerîya xo bi Îdareyê Xoser est ê. Semedo ke qirkerdişê elewîyan de Îdareyê Xoserî hewl da hetkarî elewîyan ra bikero. La hemverê qirkerdişî de bêvengîyêk pîl est o.”

	 

	'Ma hetê cinîyanê elewîyan de yê’

	 

	Ronahî Hesen tewr peyîn wina va: "Ma sey cinîyê Sûrîye de ciwîyenê, ganî yewîya xo awan bikerê. Yewin rayîrê hemverê hêrişan, rêxistinbîyayîş o. Wexto ke rêxistin çinî bo, ma do bibê hedeê hêrişan. Sey Îdareyê Xoserî, ma dîyar kenê ke ma hetê cinîyanê elewîyan de yê û ma wareyê hempar wayîr vejîyê. Xebatê ma semedê vernîgirewtişê qetlîamê uca û resnayîşê cinîyan yê ver bi herêmê asayîşî dewam keno.”