Pêwa ke dej ciwîyaya ancî zî waştişê aştîye kena 2025-04-30 11:18:48   Derya Ren   DÎLOK - Kamîle Aras ke lajê aye mîyanê refanê HPG’yî de dinyaya xo bedelna, lajêk aye tepişte yo û di heb tutê aye zî surgun ê, dîyar kerd ke a paştdayîş dana vengdayîşê "aştî û komelê demokratîkî" yê Rayberê Şarê Kurdî Abdullah Ocalanî û va: “Do azadîya fîzîkî ya Abdullah Ocalanî aştîye bîyaro.”   Rayberê Şarê Kurdî Abdullah Ocalanî 27ê Sibate de "vengdayîşê aştî û komelê demokratîkî" kerd. Vengdayîş kewt rojeva pêro dinya û hukmatê AKP’yî nêzdîbîyayîşê xo yê hemverê problemê kurdî de reyke bîn da werte. 7ine heta 70 serre her kes wayîrê vengdayîşî vejîya û bi coş pêşwazî kerdî.   Yew kesa ke paştdayîş da vengdayîş û va, ganî êdî gamê lazimî bêrê eştiş cinîya bi nameyê Kamîle Aras a.   Êlih ra ver bi Dîlok   Kamîle Aras semedê zextê dewlete û problemê ekonomî 1994ine de keyeyê xo dir koçê Edenê kena. Badê 2011ine de bar kenê Dîlok. Badê barkerdişî çend aşmî dima di lajê aye yenê tepiştiş.   Berê zîndanan   Kamîle Aras pêwa nê zextan sere nêtewênena û hîrê serrî û nîm şina zîndanê Kurkçulerî yê Edene. Paştdayîş dana her di tutanê xo.    Zextê dewlete   Her di lajê aye 2014ine de yenê tahlîyekerdiş. Ercan Aras çend aşmî dima tewrê HPG’yî beno. Eynî serre Abdullah Aras zî tewrê HPG’yî beno.      Nêame dermankerdiş   Kamîle Aras da zanayîş ke 2017ine de lajê aye Ercan Aras pêrodayîş de birîndar bîyo û esîr ameyo girewtiş. Badê yeno tepiştiş îşkenceyê giran vîneno û nîno dermankerdiş, şirawenê zîndanê Bedlîsî. Badê di aşman ewil şirawenê Tokat û badê zî surgunê zîndanê Yozgatî kenê û cezaya muebetî birnenê. Kamîle Aras wina va: “Lajê mi nêame dermankerdiş. Parçeyê şarapnelî gineno sereyê ey ro. Zîndanê Tokatî de hevalê ey dermankerdişê ey kenê. Badê şirawitî Yozgat û hucreyê yew kesî de yeno tepiştiş. Nêweşîya ey yê hemoroîdî est a. Benê doktor û wazenê verê leşkeran de derman bikerê. La lajê mi qebûl nêkeno û badê benê zîndan.”   Lajê Kamîle Aras, Abdullah Aras zî tewrê HPG’yî beno, 2019ine de di hevalanê xo dir pêrodayîşêk de dinyaya xo bedelneno. Kamîle Aras serrêke dima  agahîya şehadetê lajê xo gêna. Pêwa nê di tutê Kamîle Aras zî semedê zextê dewlete koçê Ewropa kenê.    ‘Xoverdayîş ciwîyayîş o’   Kamîle Aras dîyar kerd ke pêwa pêro dejan aye aştî wazena û vengdayîşê Rayberê Şarê Kurdî Abdullah Ocalanî rê paştî dana. Kamîle Aras wina va: “Azadîya fîzîkî ya Abdullah Ocalanî do aştî bîyara. Ma aştî wazenê. Do heta key no pêrodayîş û şer dewam bikero. Tutê ma surgun de yê, zindanan de yê. Zindanan de hezaran tepişteyê nêweşî est ê. Îqtîdar ciwanan rê zîndan virazneno. La ma her şert û mercî de vanê xoverdayîş ciwîyayîş o.”