Hemsereka OHD’yî ya Rihayî: Ganî heqê hêvîye pê bêro 

2025-05-22 10:27:21


	 

	 

	Derya Ren

	 

	RIHA - Hemsereka Şubeyê ÎHD’yî ya Rihayî Gul Fehîme Bînîcî derheqê heqê hêvîye û gamê ke ganî Tirkîya bierzo de ercna û va: “Ganî Tirkîya derheqê heqê hêvîye de sererastkerdiş bikero. Ganî Tirkîya vernîya her çî bîyayîşê kurdan qebûl bikero.”

	 

	Zîndanê Kurdistan û Tirkîya de tecrîd û îzolasyon dewam keno. Dadgeha Heqê Merdiman ê Ewropa (DMME) 18ê adara 2014ine de, cezaya muebetê giran ke Rayberê Şarê Kurdî Abdullah Ocalanî rê ameya birnayîş, goreyê ‘esasê heqê hêvîye’ hemverê 3ine madeyê Peymana Heqê Merdiman ê Ewropayî (PMME) vîna. La heta nika Tirkîya derheqê babete de tu sererastkerdişêk nêkerda.

	 

	Hemsereka OHD’yî ya Rihayî Gul Fehîme Bînîcî derheqê babete de qisey kerd û va, heqê hêvîye dir qebûlkerdişê bîyayîşê şarê kurdî zî ferz o.

	 

	‘Gamî nêameyê eştiş’

	 

	Gul Fehîme Bînîcî dîyar kerd ke Konseyê Ewropayî derheqê heqê hêvîye de heta aşma êlule dem dayo Tirkîya û semedê Tirkîya derheqê heqê hêvîye de sererastkerdişêk bikero demêk wina daya Tirkîya. Gul Fehîme Bînîcî wina va: “Heta nika Tirkîya gamêke somut nêeşta. Derheqê nê de prosesê 2014-2016ine de pêşnîyaz qanûnî ameyê dayîş zî est ê. La heta nika tu gamêke nêameyê eştiş. Dewlete derheqê heqê hêvîye de sererastkerdişêk bikero; do rewşa kesê muebetê giran girewtê de zî sererastkerdişêk bêro kerdiş.”

	 

	ÎGK û heqê hêvîye

	 

	Gul Fehîme Bînîcî dewam de wina va: “Heyet, pêwa qerarê tahliyeyê bi şert yeno zî tepişteyan tahliye nêkeno. Persê sey ‘şima derheqê PKK’yî de çi fikrîyenê?’, ‘Derheqê Abdullah Ocalanî de çi fikrîyenê?, Hetê îdeolojîk de ti ça de yê?’ persenş. Yan zî derbazbîyayîşê qawişanê bêhetan tehdîd kenê. Nê hetî ra ganî nê heyetî bêrê wedaritiş. Eynî wextî de ganî heqê hêvîye pê bêro. Tirkîya de heqê hêvîye pê bêro û heyetî bêrê wedaritiş do vurnayîşêk somut pê bêro.”

	 

	‘Ganî Tirkîya çarçewaya vengdayîşî de têbigêro’

	 

	Gul Fehîme Bînîcî bale ant ‘aştî û komelê demokratîkî’ yê Abdullah Ocalanî yê 27’ê Sibatê de kerdo ser û va; dewlete badê vengdayîşî gamêke somutî nêeşta û wina va: “Ganî Tirkîya derheqê heqê hêvîye de sererastkerdişêk bikero. Ganî Tirkîya vernîya her çî bîyayîşê kurdan qebûl bikero. Ganî Tirkîya çarçewaya vengdayîşî de têbigêro.”