Rojhelat ra heta Rojawan mesaj: Yewîya xo awan bikerê

2026-01-28 10:49:50


	 

	Neslîhan Kardaş-Rojda Aydin 

	 

	MÊRDÎN - Bahar a rojhelatije û semedê piştîdayîşê xoverdayîşê Nisêbîn ke sînorê Qamişloyî ser o ameya, bale ant yewîya şarê kurdî ser o û va: “Eke şarê kurdî bibê yew, tu kes nêeşko bi ma çîyêk bikero.”

	 

	Cinîyêka Rojhelatê Kurdistanî ra sînoro ke  xerîteyî ameyê xêzkerdiş derbas kerd û bî beşêk vengo ke Vakurê Kurdistanî de hemverê hêrişê Rojawanî ser o berz beno. Hetêk ra hewrê şerî Rojawanî ser o gêrenê, heto bîn ra xoverdayîşê şarê Rojhelatî dewam keno… No xoverdayîşo ke herêmê cîya yê cografyaya kurdan veng dano, bi taybetî wareyê pêroyî de sey îfadeyê çarenûsêk hembeş û têkoşînêk hempar ke hetê cinîyan ra yeno îdarekerdiş, xo mojneno. No helwest tenya vurnayîşê cayî nêbi; no dewamkerdişê xoverdayîşê şarî yê Rojhelatî bi û heta Rojawan derg bi. Cografyaya parçekerde ya şarê kurdî de, gamê cinîyan rayîrê nêrazîbîyayîşêk hempar taqîb kenê.

	 

	Bahara ke bajarê Seqizî ya Rojhelat ra ameya Vakurê Kurdistanî û semedê sebebê asayîşî peynameyê xo nêvana, ajansê ma rê qisey kerd.

	 

	‘Lajê mi fermandarê koyan bî’

	 

	Lajê Bahare, Hewrê Çiya ke bajarê Ciwanro yê Eyaletê Kirmanşahî de ameyo dinya serra 2014ine de tewrê PKK’yî bi. Bahare wina va: “Lajê mi fermandarê koyan bi. Serra 2014ine de tewrê PKK’yî bi. Lajê mi bi kitab û fikrê Apoyî dir aver berd û pîl bi.”

	 

	‘Ganî heme şarê kurdî wurzê lingan ser’

	 

	Bahare bale ant hêrişê Rojawanî ser û wina dewam kerd: “Hêrişê Rojawanî ser o hemverê Vakur, Başûr û Rojhelatî yê. Eke Rojawan bikewo do heme Kurdistan bikewo. Mesut Barzanî zî wa nê baş bizano. Ganî Mesut Barzanî zî kîşte şarê kurdî de bibo. Nê semedî ra ganî heme kurdî bibê yew, eke nêbê yew do heme Kurdistan çin bibo. Do kurdan ra ca nêverdê. Ganî tu kes nêterso û bi ceserat bibo. Eke xiyanet bêro kerdiş do Kurdistan zî nêmano. Eke heme şarê kurdî bibê yew do tu kes û ne zî dewletê mîyanneteweyî bieşkê tu çîyêk bikerê. Her biciwîyo Kurd û Kurdistan.”

	 

	‘Ma şer nêwazenê’

	 

	Bahare dîyar kerd ke ê semedê welatêk azad û piştîdayîşê Rojawanî ameya sînorê Qamişloyî û wina qisey kerd: “Semedê welatêk azad û no şer vindero ez ewro ameya sînorê Qamişloyî. Ma şer nêwazenê. Ma bi hezaran rey vat û ma do vajê; ma tenya aştîye wazenê. Eke şer bêro verê berê ma ma zî mecbûr ê şer bikerê û herra xo bipawê.”

	 

	‘Ma Kurdistanêk xoser wazenê’

	 

	Bahare bale ant ser serewedaritişê şarê Rojhelatî û va: “Rojhelat de xoverdayîşê şarî dewam keno. Labelê nika înternet birnayê û şebeke çin o. Ma nêeşkenê tu agahî uca ra bigîrê. Qetî do Kurdistan awan bibo. Ma Kurdistanêk xoser wazenê.”