Mexmûr de Roja Ziwanê Dayîke ame pîrozkerdiş 2026-02-21 13:44:58   MERKEZÊ XEBERAN - Wargehê Multecîyan ê Mexmûrî (Şehîd Rustem Cûdî) Roja Ziwanê Dayîke ya Dinya de bi beşdarbîyayîşê wendekar û mamosteyan bi eşkerayîyêke ame pîrozkerdiş.   Wargehê Multecîyan ê Şehîd Rustem Cûdî (Mexmûr) 21ê Sibate Roja Ziwanê Dayîke ya Dinya de bi beşdarbîyayîşê wendekar û mamosteyan bi eşkerayîyêke ame pîrozkerdiş.   Vernîya eşkerayîye bêro wendiş semedê heme şehîdê azadîya Kurdistanî deqeyêk rêze ame girewtiş. Dimayê rêzgirewtişî hetê wendekara bi nameyê Sosin Bayar eşkerayîye ameye wendiş.   ‘Ziwanê dayîke sey şitê dayîke helal û pîroz o’   Sosin Bayar destpêkê eşkerayîye de dîyar kerd ke Roja Ziwanê Dayîke dinya de roşanê bîyayîşî, vengê nasname û hişyarkerdişê hîsê merdimayî yo û wina va: “Ziwanê dayîke sey şitê dayîke helal û pîroz o. O yewine awaz o ke keweno goşê tut û yewine roşnayî ya ke tarîtîyê nêzanayîşî visna yo. Wexto merdim bi ziwanê xo qisey keno, tarîxê babî û kalan, dej û janê seserran û huyayîşê xo ano ziwan.”    ‘Wa na roje bibo sebebê hişyarîyê wijdanan’   Sosin Bayar tewr peyên wina va: “Lazim o ma zî sey şarê Bangladeşî semedê fermîkerdişê ziwanê xo her cayî de wurzê lingan ser, hemverê îşxalkeran vengê xo berz bikerê û heta bi destkerdişê azadîye bidomnê. Wa na roje bibo sebebê hişyarbîyayîşê wijdanan. Wa tutî bi ziwanê xo bihuyê, bi ziwanê xo hewnan bivînê û bi ziwanê xo dinya bivurnê.